© Translations published on
Permission to re-publish this translation has been granted by
for the sole purpose of its inclusion in the Court’s database HUDOC.
R.H. gegn Svíþjóð
Dómur frá 10. september 2015
Mál nr. 4601/14
3. gr. Bann við pyndingum
Útlendingar. Umsókn um hæli. Brottvísun.
1. Málsatvik
Kærandi er sómalskur ríkisborgari fædd 1988 og búsett í Svíþjóð. Árið 2011 sótti hún um hæli í Svíþjóð eftir að hafa dvalist þar um fjögurra ára skeið án dvalarleyfis. Hún kom til landsins frá Ítalíu með millilendingu í Hollandi. Í viðtali í janúar 2013 hélt kærandi því fram að hún hafi flúið frá Sómalíu ásamt kærasta sínum eftir að hafa verið þvinguð til hjónabands með eldri manni og í kjölfarið verið tekin höndum, barin og hent aftan af bíl af frændum sínum eftir að upp komst um kærasta hennar. Foreldrar hennar og kærasti höfðu látist síðan þá og hélt hún því fram að yrði hún send aftur til heimalandsins yrði henni gert að ganga í hjónaband gegn vilja sínum og ætti á hættu að vera drepin af frændum sínum. Þar sem hana skorti jafnframt stuðningsnet sem skipað væri körlum ætti hún á hættu að verða fyrir kynferðisofbeldi og verða útskúfað úr samfélaginu.
Sænska Útlendingastofnunin synjaði umsókn hennar um hæli í júní 2013 og fyrirskipaði brottvísun hennar til Sómalíu eftir að hafa metið það svo að vitnisburður hennar væri ekki trúverðugur. Tekið var fram að hún hefði dvalist í landinu ólöglega í fjögur ár og sótt um hæli bæði í Hollandi og Ítalíu áður en hún kom til Svíþjóðar. Hafi hún jafnframt fyrst sagst hafa yfirgefið Sómalíu vegna stríðsins, en síðar breytt sögu sinni á þann veg að hún væri að flýja þvingað hjónaband og fjölskylduhætti.
Kærandi reyndi að fá synjuninni hnekkt, hún hélt þá fram að frændur hennar hefðu gengið til liðs við jihadista hreyfinguna al-Shabab. Þeir hefðu þvingað bróður hennar til liðs við sig og drepið systur hennar. Beiðninni var aftur synjað í september 2013.
2. Meðferð málsins hjá Mannréttindadómstólnum
Kæran
Kærandi byggir kæru sína á því að með brottvísun hennar til Sómalíu væri hún send í aðstæður sem fælu í sér vanvirðandi og ómannlega meðferð sem fæli í sér brot gegn 3. gr. sáttmálans.
Niðurstaða
Dómstóllinn tók fram að yrði kærandi send úr landi yrði hún send til höfuðborgarinnar Mogadishu og engin hætta væri á að hún myndi þurfa að ferðast í gegnum eða enda í öðrum hlutum landsins. Dómstóllinn hafði áður í máli K.A.B. gegn Svíþjóð árið 2013 komist að þeirri niðurstöðu að aðstæður í borginni fælu ekki einar sér í sér brot gegn 3. gr. Þrátt fyrir að aðstæður í landinu væru breytilegar væri ekkert fram komið sem sýndi fram á að aðstæður í Mogadishu hefðu breyst að þessu leyti. Hins vegar var kærandi í fyrrgreindu K.A.B. máli karlmaður fæddur árið 1960 og aðstæður því að mörgu leyti frábrugðnar þessu máli. Margar skýrslur bentu til kerfisbundins ofbeldis gagnvart konum í Sómalíu. Tók því dómstóllinn fram að ung kona án stuðningsnets sem skipað væri körlum væri í hættu á ómannúðlegri eða vanvirðandi meðferð í skilningi 3. gr.
Dómstóllinn komst loks að þeirri niðurstöðu, að teknu tilliti til aðstæðna í landinu, að staðreyndir málsins leiddu ekki til þeirrar ályktunar að kærandi ætti á hættu að verða fyrir vanvirðandi eða ómannúðlegri meðferð yrði hún send til Sómalíu. Kærandi hefði verið tvísaga í vitnisburði sínum um aðstæður sínar í ríkinu og hætturnar sem henni myndu mæta þar. Ekkert í gögnum málsins benti til að hún kæmi til Mogadishu sem ein og óstudd kona með þeim hættum sem því fylgdu. Gögn málsins sýndu þvert á móti að hún myndi hafa aðgang að bæði fjölskyldu og stuðningsneti. Enn fremur væri ekkert sem sýndi að hún myndi þurfa að búa í flóttamannabúðum. Að þessu sögðu komst dómstóllinn að þeirri niðurstöðu að brottvísun hennar fæli ekki í sér brot á 3. gr. sáttmálans.
Full & Egal Universal Law Academy