Digriet tal-Qorti tal-Ġustizzja (Is-Seba’ Awla) tat-3 ta’ Settembru 2009 – Lubricantes y Carburantes Galaicos vs GALP Energía España
(Kawża C‑506/07)
“L-ewwel subparagrafu tal-Artikolu 104(3) tar-Regoli tal-Proċedura – Kompetizzjoni – Akkordji – Artikolu 81 KE – Kuntratt ta’ provvista esklużiva ta’ karburanti u ta’ kombustibbli konkluż bejn fornitur u operatur ta’ pompa tal-petrol – Eżenzjoni – Ftehim ta’ importanza sekondarja – Regolament (KEE) Nru 1984/83 – Artikolu 12(2) – Regolament (KE) Nru 2790/1999 – Artikoli 4(a) u 5(a) – Tul tal-esklużività – Iffissar tal-prezz tal-bejgħ lill-pubbliku”
1. Kompetizzjoni – Akkordji – Projbizzjoni – Kundizzjonijiet – Effett fuq il-kummerċ bejn Stati Membri – Effett ħażin fuq il-kompetizzjoni – Effett sinjifikattiv – Ftehim ta’ distribuzzjoni esklużiva ta’ karburanti u ta’ kombustibbli bejn fornitur u operator ta’ pompa tal-petrol li ma jibbenefikax minn eżenzjoni skont il-kategorija (Artikolu 81(1) KE) (ara l-punti 22-26, 33 u d-dispożittiv 1)
2. Kompetizzjoni – Akkordji – Effett ħażin fuq il-kompetizzjoni – Ftehim ta’ xiri esklużiv – Kriterji ta’ evalwazzjoni – Aċċessibbiltà għas-suq (Artikolu 81(1) KE) (ara l-punti 28-32)
3. Kompetizzjoni – Akkordji – Projbizzjoni – Eżenzjoni skont il-kategoriji – Ftehim ta’ xiri esklużiv – Regolament Nru 1984/83 – Ftehim ta’ distribuzzjoni esklużiva ta’ karburanti u kombustibbli bejn fornitur u operatur ta’ pompa tal-petrol – Tul massimu – Deroga (l-Artikolu 81(3) KE; Regolament tal-Kummissjoni Nru 1984/83, kif emendat bir-Regolament Nru 1582/97, Artikolu 12(2)) (ara l-punti 34-41 u d-dispożittiv 2)
4. Kompetizzjoni – Akkordji – Projbizzjoni – Eżenzjoni skont il-kategoriji – Ftehim vertikali – Regolament Nru 2790/1999 – Ftehim ta’ distribuzzjoni esklużiva ta’ karburanti u kombustibbli bejn fornitur u operatur ta’ pompa tal-petrol – Tul massimu – Deroga (Artikolu 81(3) KE; Regolament tal-Kummissjoni Nru 2790/1999, Artikolu 5(a)) (ara l-punti 42-47 u d‑dispożittiv 3)
5. Kompetizzjoni – Akkordji – Projbizzjoni – Eżenzjoni skont il-kategoriji – Ftehim ta’ xiri esklużiv – Regolament Nru 1984/83 – Ftehim vertikali – Regolament Nru 2790/1999 – Iffissar ta’ prezz tal-bejgħ irrakkomandat (Regolamenti tal-Kummissjoni Nru 1984/83, kif emendat bir-Regolament Nru 1582/97, Artikolu 11, u Nru 2790/1999, Artikolu 4(a)) (ara l-punti 49‑56 u d-dispożittiv 4)
Suġġett
Talba għal deċiżjoni preliminari - Audiencia Provincial de La Coruña - Interpretazzjoni tal-Artikolu 81(1)(a) KE, tal-premessa 8 u tal-Artikoli 10 u 12(1)(ċ) u (2) tar-Regolament tal-Kummissjoni (KEE) Nru 1984/83, tat-22 ta’ Ġunju 1983, dwar l-applikazzjoni tal-Artikolu 85(3) tat-Trattat għal kategoriji ta’ ftehim ta’ xiri esklużiv (ĠU L 173, p. 5) u tal-Artikoli 4(a) u 5 tar-Regolament tal-Kummissjoni (KE) Nru 2790/1999, tat-22 ta’ Diċembru 1999, dwar l-applikazzjoni tal-Artikolu 81(3) tat-Trattat għal kategoriji ta’ ftehim vertikali u prattiċi miftiehma (ĠU Edizzjoni Speċjali bil-Malti, Kapitolu 8, Vol. 1, p. 364) – Ftehim ta’ distribuzzjoni esklużiva ta’ karburanti u ta’ kombustibbli bejn fornitur u operator ta’ pompa tal-petrol – Pompa tal-petrol mibnija mill-fornitur permezz ta’ konċessjoni għall-bini u l-iżviluppar mogħtija mill-bejjiegħ mill-ġdid għal perijodu ta’ 25 sena fuq parti mill-proprjetà u mogħtija għat-tgawdija minn dan tal-aħħar għall-istess tul ta’ żmien.
Dispożittiv
1)
Kuntratt, bħal dak inkwistjoni fil-kawża prinċipali, li jipprovdi għall-istabbiliment ta’ dritt in rem, imsejjaħ “konċessjoni għall-bini u l-iżviluppar”, favur fornitur ta’ prodotti taż-żejt għal perijodu ta’ 25 sena u li jawtorizza lil dan tal-aħħar jibni pompa tal-petrol u jagħtiha b’kiri lill-proprjetarju tal-art għal perijodu ekwivalenti għat-tul ta’ żmien ta’ dan id-dritt, fil-każ li jkun fih klawżoli dwar l-iffissar tal-prezz tal-bejgħ ta’ prodotti lill-pubbliku u/jew dwar obbligu ta’ xiri esklużiv jew ta’ nonkompetizzjoni li l-perijodu tal-applikazzjoni tiegħu jeċċedi l-limiti ta’ żmien previsti mir-Regolament tal-Kummissjoni (KEE) Nru 1984/83, tat-22 ta’ Ġunju 1983, dwar l-applikazzjoni tal-Artikolu [81](3) tat-Trattat għal kategoriji ta’ ftehim ta’ xiri esklużiv, kif emendat bir-Regolament tal-Kummissjoni (KE) Nru 1582/97, tat-30 ta’ Lulju 1997, kif ukoll kif previsti mir-Regolament tal-Kummissjoni (KE) Nru 2790/1999, tat-22 ta’ Diċembru 1999, dwar l-applikazzjoni tal-Artikolu 81(3) tat-Trattat għal kategoriji ta’ ftehim vertikali u prattiċi miftiehma, ma jaqax taħt il-projbizzjoni stabbilita fl-Artikolu 81(1) KE, bil-kundizzjoni li ma jkunx jista’ jaffettwa l-kummerċ bejn l-Istati Membri u li ma għandux l-għan jew l-effett li jirrestrinġi b’mod sinjifikattiv il-kompetizzjoni, fatt li għandu jiġi stabbilit mill-qorti tar-rinviju billi tieħu inkunsiderazzjoni, b’mod partikolari, il-kuntest ekonomiku u legali li fih jinsab dan il-kuntratt.
2)
L-Artikolu 12(2) tar-Regolament tal-Kummissjoni Nru 1984/83, kif emendat bir-Regolament tal-Kummissjoni Nru 1582/97, għandu jiġi interpretat fis-sens li ma jipprekludix, għall-finijiet tal-implementazzjoni tad-deroga prevista f’dan l-artikolu, li l-perijodu tal-applikazzjoni ta’ ftehim ta’ esklużività jeċċedi l-limiti ta’ żmien previsti mill-imsemmi regolament fil-każ fejn il-proprjetarju ta’ art ta lil fornitur konċessjoni għall-bini u l-iżviluppar għal perijodu ta’ 25 sena, u fejn dan tal-aħħar obbliga ruħu li jibni pompa tal-petrol mogħtija b’kiri lill-proprjetarju tal-art sabiex jopera tali pompa tal-petrol għal perijodu ekwivalenti għat-tul ta’ żmien ta’ dan id-dritt.
3)
L-Artikolu 5(a) tar-Regolament Nru 2790/1999 għandu jiġi interpretat fis-sens li jipprekludi, għall-finijiet tal-implementazzjoni tad-deroga prevista f’dan l-artikolu, li t-tul ta’ żmien tal-applikazzjoni ta’ ftehim ta’ esklużività jeċċedi l-limiti ta’ żmien previsti mill-imsemmi regolament fil-każ fejn il-proprjetarju ta’ art ta lil fornitur konċessjoni għall-bini u l-iżviluppar għal 25 sena, u fejn dan tal-aħħar obbliga ruħu li jibni pompa tal-petrol mogħtija b’kiri lill-proprjetarju tal-art sabiex jopera tali pompa tal-petrol għal perijodu ekwivalenti għat-tul ta’ żmien ta’ dan id-dritt.
4)
Il-klawżoli kuntrattwali dwar il-prezz tal-bejgħ ta’ prodotti lill-pubbliku bħal dawk inkwistjoni fil-kawża prinċipali, jistgħu jibbenefikaw mill-eżenzjoni skont il-kategoriji taħt ir-Regolament Nru 1984/83, kif emendat bir-Regolament Nru 1582/97, kif ukoll bir-Regolament Nru 2790/1999, jekk il-fornitur jillimita ruħu li jimponi prezz tal-bejgħ massimu jew li jirrakkomanda prezz tal-bejgħ u jekk, għaldaqstant, il-bejjiegħ mill-ġdid għandu possibbiltà reali li jiddetermina dan il-prezz tal-bejgħ. Min-naħa l-oħra, tali klawżoli ma jistgħux jibbenefikaw mill-imsemmija eżenzjoni jekk dawn iwasslu, direttament jew permezz ta’ mezzi indiretti jew moħbija, għall-iffissar tal-prezz tal-bejgħ lill-pubbliku jew għal impożizzjoni tal-prezz tal-bejgħ minimu mill-fornitur. Hija l-qorti tar-rinviju li għandha tfittex mill-ġdid jekk tali obbligi jorbtux lill-bejjiegħ mill-ġdid, billi tieħu inkunsiderazzjoni l-obbligi kuntrattwali kollha meħuda fil-kuntest ekonomiku u legali tagħhom, kif ukoll l-aġir tal-partijiet fil-kawża prinċipali.
Full & Egal Universal Law Academy