Kawżi magħquda C-410/08 sa C-412/08
Swiss Caps AG
vs
Hauptzollamt Singen
(talba għal deċiżjoni preliminari mressqa mill-Finanzgericht Baden-Württemberg)
“Tariffa Doganali Komuni — Nomenklatura Magħquda — Klassifikazzjoni tariffarja — Intestaturi 1515, 1517, 2106 u 3004 — Kapsuli tal-ġelatina — Żejt tal-ħuta, taż‑żerriegħa tal-qamħ u tan-niġella — Kunċett ta’ ‘ippakkjar’”
Sommarju tas-sentenza
Tariffa Doganali Komuni — Intestaturi tariffarji — Supplimenti tal-ikel li jikkonsistu f’żejt tal-ħxejjex jew tal-annimali u f’vitamini, li jinsabu f’kapsoli tal-ġelatina
(Regolament tal-Kunsill Nru 2658/87, Anness I; Regolamenti tal-Kummissjoni Nru 3513/1992, Nru 2388/2000 u Nru 438/2007)
In-Nomenklatura Magħquda li tinsab fl-Anness I tar-Regolament Nru 2658/87 dwar in-nomenklatura tat-tariffa u l-istatistika u dwar it-Tariffa Doganali Komuni, kif emendat bir-Regolament tal-Kummissjoni (KE) Nru 2388/2000, għandha tiġi interpretata fis-sens li:
- preparazzjonijiet tal-ikel ippreżentati fil-forma ta’ kapsuli li fihom 600 mg ta’ żejt tal-ħuta konċentrat, ippressat bil-kiesaħ u 22. 8mg ta’ Vitamina E konċentrata, f’qoxra li tikkonsisti f’212.8 mg ta’ ġelatina, 77.7 mg ta’ gliċerina u 159.6 mg ta’ ilma msoffi u li jintużaw bħala supplimenti tal-ikel;
- preparazzjonijiet tal-ikel ippreżentati fil-forma ta’ kapsuli li fihom 580 mg ta’ żejt taż-żerriegħa tal-qamħ f’qoxra li tikkonsisti f’250 mg ta’ trab tal-lamtu u li jintużaw bħala supplimenti tal-ikel;
- preparazzjonijiet tal-ikel ippreżentati fil-forma ta’ kapsuli li fihom 500 mg żejt tal-kemmun iswed, ippressat bil-kiesaħ, 38.7 mg ta’ żejt tas-sojja, 18.8 mg ta’ Vitamina E, 16 mg ta’ xaħam tal-butir, 10 mg ta’ leċitina, 8.2 mg ta’ xama’, 8 mg ta’ pantotenat tal-kalċju, 0.2 mg ta’ aċidu foliku u 0.11 mg ta’ bijotina, f’qoxra li tikkonsisti f’ 313.97 mg massa ta’ ġelatina (47.3 % ta’ ġelatina, 17.2 % ta’ gliċerina, 35.5 % ta’ ilma), ta’ 4.3 mg ta’ pejst magħmul minn 50 % ta’ dijossidu tat-titanju u 50 % ta’ gliċerina u f’1.73 mg ta’ pejst magħmul minn 25 % ta’ laker tal-kinolin isfar u minn 75 % ta’ gliċerina u li jintużaw bħala supplimenti tal-ikel
jaqgħu taħt l-intestatura 2106 tal-imsemmija Nomenklatura Magħquda.
(ara l-punt 32 u d‑dispożittiv)
SENTENZA TAL‑QORTI TAL‑ĠUSTIZZJA (Il‑Ħames Awla)
17 ta’ Diċembru 2009 (*)
“Tariffa Doganali Komuni – Nomenklatura Magħquda – Klassifikazzjoni tariffarja – Intestaturi 1515, 1517, 2106 u 3004 – Kapsuli tal-ġelatina – Żejt tal‑ħuta, taż-żerriegħa tal-qamħ u tan-niġella – Kunċett ta’ ‘ippakkjar’”
Fil-Kawżi magħquda C‑410/08 sa C‑412/08
li għandhom bħala suġġett tliet talbiet għal deċiżjoni preliminari skont l‑Artikolu 234 KE, imressqa mill-Finanzgericht Bade‑Wurtemberg (il-Ġermanja), permezz ta’ deċiżjonijiet tat-2 ta’ Settembru 2008, li waslu fil-Qorti tal-Ġustizzja fit-22 ta’ Settembru 2008, fil-proċedura
Swiss Caps AG
vs
Hauptzollamt Singen,
IL‑QORTI TAL‑ĠUSTIZZJA (Il‑Ħames Awla),
komposta minn E. Levits (Relatur), President tal-Awla u M. Ilešič u J.‑J. Kasel, Imħallfin,
Avukat Ġenerali: V. Trstenjak,
Reġistratur: C. Strömholm, Amministratur,
wara li rat il-proċedura bil-miktub u wara s-seduta tad‑29 ta’ Ottubru 2009,
wara li kkunsidrat l-osservazzjonijiet ippreżentati:
– għal Swiss Caps AG, minn H.‑J. Prieß u B. Sachs, avukat,
– għall-Kummissjoni Ewropea, minn L. Bouyon u B.‑R. Killmann, bħala aġenti,
wara li rat id-deċiżjoni, meħuda wara li nstema’ l-Avukat Ġenerali, li l-kawża tinqata’ mingħajr konklużjonijiet,
tagħti l-preżenti
Sentenza
1 It-talbiet għal deċiżjoni preliminari jirrigwardaw l-interpretazzjoni tal‑intestaturi 1515, 1517, 2106 u 3004, kif ukoll ir-Regola Ġenerali 5 tan-nota ta’ spjega tan-Nomenklatura Magħquda li tinsab fl-Anness I tar-Regolament tal‑Kunsill (KEE) Nru 2658/87, tat-23 ta’ Lulju 1987, dwar in-nomenklatura tat‑tariffa u l-istatistika u dwar it-Tariffa Doganali Komuni (ĠU Edizzjoni Speċjali bil-Malti, Kapitolu 2, Vol. 2, p. 382), kif emendat l-aħħar bir-Regolament tal-Kummissjoni (KE) Nru 2388/2000, tat-13 ta’ Ottubru 2000 (ĠU L 264, p.1, iktar ‘il quddiem in-“NM”). Permezz ta’ rettifika għal dan ir-regolament (L 276, p. 92), in-numru oriġinali 2263/2000 ġie sostitwit bin-Nru 2388/2000.
2 Dawn it-talbiet tressqu fil-kuntest ta’ tliet kawżi bejn, Swiss Caps AG (iktar ‘il quddiem “Swiss Caps”) u l-Hauptzollamt Singen dwar il-klassifikazzjoni fin-NM ta’ tliet tipi ta’ kapsuli li prinċipalment fihom, żejt tal-ħuta, żejt taż-żerriegħa tal‑qamħ, u żejt tan-niġella, rispettivament, bħala preparazzjonijiet tal-ikel li din il-kumpannija importat mill-Ġermanja.
Il-kuntest ġuridiku
3 In-NM, imwaqqfa bir-Regolament Nru 2658/87, hija bbażata fuq is-sistema armonizzata għad-deskrizzjoni u l-kodifikazzjoni ta’ oġġetti (iktar ‘il quddiem is-“SA”), imfassla mill-Kunsill tal-Kooperazzjoni Doganali, li sar l-Organizzazzjoni Dinjija tad-Dwana, u mwaqqfa minn Konvenzjoni Internazzjonali konkluża fi Brussell fl-14 ta’ Ġunju 1983 u approvata f’isem il-Komunità Ewropea bid‑Deċiżjoni tal-Kunsill 87/369/KEE tas-7 ta’ April 1987 (ĠU L 198, p. 1). In‑NM adottat l-intestaturi u s-subintestaturi b’sitt ċifri tas-SA, filwaqt li s-seba’ u t-tmien ċifri biss jifformaw is-subintestaturi proprji tagħha.
4 L-ewwwl parti tan-NM tinkludi ġabra ta’ dispożizzjonijiet preliminari. F’din il‑parti, taħt l-ewwel taqsima, iddedikata għad-dispożizzjonijiet ġenerali, it‑Taqsima A, intitolata “Regoli ġenerali għall-interpretazzjoni tan-[NM]” (iktar ‘il quddiem ir-“regoli ġenerali”), tipprovdi:
“Il-klassifikazzjoni ta’ oġġetti fin-[NM] għanda tkun irregolata mill-prinċipji li ġejjin.
1. It-titoli tat-taqsimiet, kapitoli u subkapitoli huma maħsubin għall-ħeffa ta’ referenza biss; għal għanijiet legali, il-klassifikazzjoni għandha tkun deċiża skond it-termini ta’ l-intestaturi u n-noti ta’ kwalunkwe taqsima jew kapitolu relattiv u, sakemm dawn l-intestaturi jew in-noti ma jkunux jeħtieġu mod ieħor, skond id-dispożizzjonijiet li ġejjin.
2. a) Kwalunkwe referenza f’titlu għal oġġett għandha titqies li tinkludi referenza għal dak l-oġġett mhux komplut jew mhux mitmum, sakemm, kif preżentat, l-oġġett mhux komplut jew mhux mitmum ikollu l-karattru essenzjali tal-oġġett komplut jew mitmum. Għandha wkoll titqies li tinkludi referenza għal dak l-oġġett komplut jew mitmum (jew li jista’ jkun klassifikat bħala komplut jew mitmum permezz ta’ din ir-regola), preżentat mhux armat jew żarmat.
b) Kwalunkwe referenza f’titlu għal materjal jew sustanza għandha titqies li tinkludi referenza għal taħlit jew kombinazzjonijiet ta’ dak il‑materjal jew is-sustanza b’materjali jew sustanzi oħra. Kwalunkwe referenza għal oġġetti ta’ ċertu materjal jew sustanza għandha titqies li tinkludi referenza għal oġġetti li jikkonsistu totalment jew parzjalment minn materjal jew sustanza bħal din. Il-klassifikazzjoni ta’ oġġetti magħmulin minn iżjed minn materjal jew sustanza waħda għandha ssir skont il-prinċipji ta’ regola 3.
3. Meta permezz ta’ l-applikazzjoni tar-regola 2(b) jew kwalunkwe raġuni oħra, l-oġġetti jkunu klassifikati prima facie taħt intestatura waħda jew iżjed, il-klassifikazzjoni għandha ssir kif ġej:
(a) l-intestatura li tagħti l-iżjed deskrizzjoni speċifika għandha tkun preferuta għal intestaturi li jagħtu deskrizzjoni iżjed ġenerali. Madanakollu, meta jkun hemm żewġ intestaturi jew iżjed li kull waħda minnhom tirreferi għal parti waħda mill-materjali jew mis-sustanzi li qegħdin f’oġġetti mħalltin jew komposti jew għal parti biss mill-oġġetti f’sett imtella’ għal bejgħ bl-imnut, dawk l-intestaturi għandhom jitqiesu ugwalment speċifiċi fir-rigward ta’ dawk l-oġġetti, ukoll jekk waħda minnhom tagħti deskrizzjoni iżjed kompluta jew preċiża ta’ l-oġġetti;
(b) taħlitiet, oġġetti komposti li jikkonsistu minn materjali differenti jew magħmulin minn komponenti differenti, u oġġetti mtellgħin għal bejgħ bl-imnut, li ma jistgħux ikunu klassifikati b’referenza għal 3(a), għandhom ikunu klassifikati daqs li kieku kienu magħmulin mill-materjal jew mill-komponent li jagħtihom il-karattru essenzjali tagħhom, sakemm dan il-kriterju jkun applikabbli;
(ċ) meta oġġetti ma jistgħux ikunu klassifikati b’referenza għal 3(a) jew (b), huma għandhom ikunu klassifikati taħt l-intestatura li tiġi l-aħħar f’ordni numerika fost dawk li ugwalment għandha tingħatalhom konsiderazzjoni.
[...]
5. Bħala żieda mad-dispożizzjonijiet ta’ hawn fuq, ir-regoli li ġejjin għandhom japplikaw fir-rigward ta’ oġġetti imsemmijin fihom:
[...]
(b) suġġetti għad-dispożizzjonijiet tar-regola 5(a), il-materjali u l-kontenituri, ta’ l-ippakkjar ippreżentati ma’ l-oġġetti ta’ ġo fihom għandhom ikunu klassifikati ma’ l-oġġetti jekk huma ta’ tip normalment użati fl-ippakkjar ta’ oġġetti bħal dawn. Madanakollu, din id-dispożizzjoni ma torbotx meta materjali ta’ ippakkjar jew kontenituri ta’ ippakkjar bħal dawn ikunu jidhru biċ-ċar li huma qegħdin għal użu repetittiv.
[...]”
5 In-nota ta’ qiegħ il-paġna dwar it-terminu “materjali ta’ ippakkjar” u “kontenituri ta’ ippakkjar” li jinsab fir-regola 5(b) tippreċiża:
“It-termini “materjali ta’ ippakkjar” u “kontenituri ta’ ippakkjar” ifissru kwalunkwe kontenituri esterni jew interni, holders, sarr jew irfid għajr armar għat-trasport (eż. kontenituri għat-trasport), tarpolini, taljoli jew tagħmir ta’ trasport anċillari. It-terminu “kontenituri ta’ ippakkjar” ma jkoprix il-kontenituri msemmijin fir-regola ġenerali 5(a)”.
6 It-Tieni Parti tan-NM tinkludi Taqsima III, li min-naħa tagħha, tinkludi Kapitolu 15 intitolat “Xaħmijiet u żjut ta’ annimali jew ħxejjex u prodotti mill-qsim tagħhom; xaħmijiet ippreparati tajbin għall-ikel; xamgħat ta’ l-annimali jew ħxejjex”.
7 It-Taqsimiet IV u VI tan-NM jinkludu l-Kapitolu 21 intitolat “Preparazzjonijiet diversi tajbin għall-ikel”, kif ukoll il-Kapitolu 30 intitolat “Prodotti farmaċewtiċi” rispettivament.
8 In-nota ta’ spjega dwar l-intestatura 2106 hija fformulata kif ġej:
“Sakemm mhumiex ikklassifikati f’intestaturi oħra tan-Nomenklatura, din l-intestatura tinkludi:
A) Il-preparazzjonijiet intiżi għall-użu, fl-istat li jkunu jew wara pproċessar (tisjir, tidwib jew tgħollija fl-ilma jew fil-ħalib eċċ), għall-konsum mill-bniedem.
B) Il-preparazzjonijiet li jikkonsistu, fl-intier tagħhom jew parzjalment, f’oġġetti tal-ikel li jintużaw fil-preparazzjonijiet ta’ xorb jew ta’ ikel għall-konsum mill-bniedem. Huma wkoll ikklassifikati hawnhekk dawk il-preparazzjonijiet li jikkonsistu f’taħlita ta’ prodotti kimiċi (aċidi organiċi, imluħa tal-kalċju, eċċ.), u ta’ oġġetti tal-ikel (pereżempju dqiq, zokkor, trab tal-ħalib), intiżi sabiex jiġu inkorporati f’preparazzjonijiet tal-ikel, jew bħala komponenti minn dawn il-preparazzjonijiet, jew sabiex itejbu ċerti mill-karatteristiċi tagħhom (presentazzjoni, preżervazzjoni, eċċ.) (ara n-Noti Ġenerali tal-Kapitolu 38).
[...]
B’mod partikolari, huma klassifikati hawnhekk:
[...]
16) Il-preparazzjonijiet indikati ta’ spiss taħt l-isem ta’ supplimenti tal-ikel, abbażi ta’ estratti ta’ pjanti, ta’ konċentrat tal-frott, ta’ għasel, ta’ fruttożju, eċċ, miżjuda b’vitamini u xi drabi b’kwantitajiet żgħar ħafna ta’ ħadid. Ħafna drabi dawn il-preparazzjonijiet huma ppreżentati f’ippakkjar li jindika li huma intiżi sabiex iżommu l-benesseri tal-bniedem. Il-preparazzjonijiet simili li huma intiżi sabiex jipprevjenu jew ifejqu l-mard jew uġiegħ huma esklużi (Nru 30.03 jew 30.04)”. [traduzzjoni mhux uffiċjali]
Il-kawżi prinċipali u d-domandi preliminari
Kawża C‑410/08
9 Fit‑8 ta’ Frar 2001 Swiss Caps iddikjarat għall-importazzjoni fil-Ġermanja, żewġ kaxxi kapsuli tal-ġelatina ratba tal-Omega 3, mhux ippreżentati għall-bejgħ bl‑imnut, fis-subintestatura 2106 9098 tan-NM.
10 Kull kapsula fiha 600 mg żejt tal-ħuta kkonċentrat, ippressat bil-kiesaħ, u 22.8 mg Vitamina E ikkonċentrata. Il-qoxra ta’ kull waħda minn dawn il-kapsuli tikkonsisti f’212.8 mg ta’ ġelatina, 77.7 mg ta’ gliċerina u 159.6 mg ta’ ilma msoffi.
11 Permezz ta’ deċiżjoni tat-13 ta’ Diċembru 2001, il-Hauptzollamt Singen qies li l‑kapsuli tal-Omega‑3 kellhom jiġu kklassifikati fis-subintestatura 1517 9099 u, konsegwentement, żied id-dazji fuq l-importazzjoni oriġinali, minn DM 525.73 (jiġifieri madwar EUR 263) għal EUR 1058.30. Swiss Caps ippreżentat dan ir-rikors, kontra din id-deċiżjoni, quddiem il-Finanzgericht Bade‑Wurtemberg.
12 Fid-dawl tal-kontenut tal-kapsuli inkwistjoni fil-kawża principali, tal-mod kif jaħdmu, tal-ippakkjar tagħhom u tal-fatt li jirrigwardaw indubjament preparazzjonijiet tal-ikel li jintużaw bħala suppliment, il-qorti tar-rinviju tesprimi dubji dwar il-klassifikazzjoni ta’ dawn il-prodotti fl-intestatura 1517.
13 F’dawn iċ-ċirkustanzi, il-Finanzgericht du Bade-Wurtemberg iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:
“1) L-intestatura 1517 tan-[NM] għandha tiġi interpretata fis-sens li preparazzjonijiet kkostitwiti biss minn żejt jew xaħam – konċentrat – biż‑żieda unika tal-vitamina E u li, għall-bqija, ma ġewx suġġetti għal trattament, għandhom jiġu kklassifikati taħt din l-intestatura?
2) Fil-każ ta’ risposta pożittiva għall-ewwel domanda:
L-intestatura 1517 tan-[NM] għandha tiġi interpretata fis-sens li ż-żieda ta’ vitamina E ikkonċentrata (konċentrat ta’ d-alpha-tocopherol) fl-ammont ta’ 22.8 mg għal kull 600 mg ta’ żejt tal-ħuta konċentrat (Incromega EPA SR 500 TG) twassal għall-esklużjoni tal-prodott minn din l-intestatura?
3) Fil-każ ta’ risposta pożittiva għall-ewwel domanda u ta’ risposta negattiva għat-tieni domanda:
I[r-regola ġenerali 5] għandha tiġi interpretata fis-sens li l-qoxra tal-kapsuli magħmula minn 212.8 mg ta’ ġelatina, 77.7 mg ta’ gliċerina u 150.6 mg ta’ ilma msoffi u li fihom is-sustanza użata bħala supplement tal-ikel għandha tiġi kkunsidrata bħala ppakkjar?
4) Fil-każ ta’ risposta negattiva għat-tielet domanda:
L-intestatura 1517 tan-[NM] għandha tiġi interpretata fis-sens li l-qoxra tal‑kapsuli magħmula minn 212.8 mg ta’ ġelatina, 77.7 mg ta’ gliċerina u 159.6 mg ta’ ilma msoffi twassal għall-esklużjoni tal-kapsuli deskritti iktar ’il fuq, minn din l-intestatura?”
Kawża C‑411/08
14 Fit-30 ta’ April 2001 Swiss Caps iddikjarat għall-importazzjoni fil-Ġermanja palit ta’ kapsuli taż-żerriegħa tal-qamħ, mhux ippreżentata għall-bejgħ bl-imnut, fis‑subintestatura 2106 9098 tan-NM.
15 Kull kapsula fiha 580 mg ta’ żejt taż-żerriegħa tal-qamħ, li l-ippakkjar tagħhom huwa magħmul minn qoxra li tikkonsisti f’ 250 mg ta’ trab tal-lamtu.
16 Permezz ta’ deċiżjoni tat-13 ta’ Diċembru 2001, il-Haupzollamt Singen qies li l‑kapsuli taż-żerriegħa tal-qamħ kellhom jiġu kklassifikati fis-subintestatura 1515 9099 u, konsegwentement, żied id-dazji fuq l-importazzjoni oriġinali, minn DM 100.74 (jiġifieri madwar EUR 50) għal EUR 125.74. Swiss Caps ippreżentat dan ir-rikors, kontra din id-deċiżjoni, quddiem il-Finanzgericht Bade‑Wurtemberg.
17 Fid-dawl tal-ippakkjar tal-kapsuli inkwistjoni fil-kawża principali, u tal-fatt li jirrigwardaw indubjament preparazzjonijiet tal-ikel li jintużaw bħala suppliment, il-qorti tar-rinviju tesprimi dubji dwar il-klassifikazzjoni ta’ dawn il-prodotti fl-intestatura 1515.
18 F’dawn iċ-ċirkustanzi, il-Finanzgericht du Bade-Wurtemberg iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:
“1) I[r-regola ġenerali 5] għandha tiġi interpretata fis-sens li l-qoxra tal-kapsuli magħmula minn trab tal-lamtu u li fihom sustanzi li huma ta’ supplement tal-ikel għandha tiġi kkunsidrata bħala ippakkjar?
2) Fil-każ ta’ risposta negattiva għall-ewwel domanda:
L-intestatura 1515 tan-[NM] għandha tiġi interpretata fis-sens li l-qoxra tal‑kapsuli għandha tiġi interpretata fis-sens li kapsuli tal-pilloli magħmula minn trab tal-lamtu u li fihom 580 mg ta’ konċentrat żejt taż-żerriegħa tal-qamħ jaffettwaw in-natura tal-prodott b’tali mod li dan huwa eskluż mill-intestatura 1515 tan-[NM]?”
Kawża C‑412/08
19 Fis-16 ta’ Ottubru 2000 Swiss Caps iddikjarat għall-importazzjoni fil-Ġermanja palit ta’ kapsuli taż-żejt tal-kemmun iswed, mhux ippreżentati għall-bejgħ bl‑imnut, fis-subintestatura 2106 9098 tan-NM
20 Kull kapsula fiha 500 mg żejt tal-kemmun iswed, ippressat bil-kiesaħ, 38.7 mg ta’ żejt tas-sojja, 18.8 mg ta’ Vitamina E, 16 mg ta’ xaħam tal-butir, 10 mg ta’ leċitina, 8.2 mg ta’ xama’, 8 mg ta’ pantotenat tal-kalċju, 0.2 mg ta’ aċidu foliku u 0.11 mg ta’ bijotina. Il-qoxra ta’ kull kapsula tikkonsisti f’313.97 mg massa ta’ ġelatina (47.3 % ta’ ġelatina, 17.2 % ta’ gliċerina, 35.5 % ta’ ilma), f’4.30 mg ta’ pejst magħmul minn 50 % ta’diossidu tat-titanju u 50 % ta’ gliċerina u f’1.73 mg ta’ pejst magħmul minn 25 % ta’ laker tal-kinolin isfar u minn 75 % ta’ gliċerina.
21 Permezz ta’ deċiżjoni tat-2 ta’ Mejju 2001, il-Haupzollamt Singen qies li l-kapsuli kapsuli taż-żejt tal-kemmun iswed kellhom jiġu kklassifikati fis-subintestatura 1517 9099 u, konsegwentement, żied id-dazji fuq l-importazzjoni oriġinali, minn DM 1 226.71 (jiġifieri madwar EUR 613) għal DM 2 672.84 (jiġifieri madwar EUR 1 336). Swiss Caps ippreżentat dan ir-rikors, kontra din id‑deċiżjoni, quddiem il-Finanzgericht Bade‑Wurtemberg.
22 Fid-dawl tal-kontenut tal-kapsuli inkwistjoni fil-kawża principali, tal-ippakkjar tagħhom u tal-fatt li jirrigwardaw indubjament preparazzjonijiet tal-ikel li jintużaw bħala suppliment, il-qorti tar-rinviju tesprimi dubji dwar il‑klassifikazzjoni ta’ dawn il-prodotti fl-intestatura 1517 tan-NM.
23 F’dawn iċ-ċirkustanzi, il-Finanzgericht du Bade-Wurtemberg iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:
“1) L-intestatura 1517 tan-[NM] għandha tiġi interpretata fis-sens li ż-żieda ta’ 10 mg ta’ leċitina, ta’ 18.8 mg ta’ vitamina E, ta’ 8.2 mg ta’ xama’, ta’ 8 mg ta’ pantotenat tal-kalċju, ta’ 0.2 mg ta’ aċidu foliku, u ta’ 0.11 mg ta’ bijotina ma’ taħlita ta’ 500 mg ta’ żejt tal-kemmun iswed ippressat bil‑kiesaħ (62.5 % jew 83.3 %), ta’ 38.7 mg ta’ żejt tas-sojja u 16 mg ta’ xaħam tal-butir hija tant żgħira li ma taffettwax il-klassifikazzjoni ta’ tali preparazzjonijet taħt din l-intestatura?
2) Fil-każ li r-risposta li tingħata għall-ewwel domanda tkun fl-affermattiv:
Ir-[regola ġenerali 5] għandha tiġi interpretata fis-sens li l-qoxra tal-kapsuli li fiha s-sustanzi msemmija iktar ‘il fuq għandha tiġi kkunsidrata bħala ppakkjar?
3. Fil-każ li r-risposta li tingħata għat-tieni domanda tkun fin-negattiv:
L-intestatura 1517 tan-[NM] għandha tiġi interpretata fis-sens li l-fatt li l‑qoxra tal-kapsuli li tikkonsisti f’313.97 mg ta’ massa ta’ ġelatina (47.3 % ta’ ġelatina, 17.2 % ta’ gliċerina, 35.5 % ta’ ilma), minn 4.30 mg ta’ pejst magħmul minn 50 % ta’ diossidu tat-titanju u 50 % ta’ gliċerina u minn 1.73 mg ta’ pejst magħmul minn 25 % ta’ laker tal-kinolin isfar u 75 % ta’ gliċerina twassal għall-esklużjoni tal-kapsuli deskritti iktar ‘il fuq, minn din l-intestatura?”
Fuq id-domandi preliminari
24 Preliminarjament, għandu jiġi enfasizzat li, fit-tliet kawżi, il-prodotti li dwarhom il-qorti tar-rinviju tistaqsi, essenzjalment, il-klassifikazzjoni tal-Qorti tal‑Ġustizzja, għandhom karatteristiċi simili, jiġifieri li, skont l-imsemmija qorti, dawn jirrigwardaw preparazzjonijiet tal-ikel li jintużaw bħala suppliment, li jikkonsistu prinċipalment f’żejt tal-ħxejjex jew tal-annimali li ġie miżjud b’ċertu kwantità ta’ vitamini. Dawn il-preparazzjonijiet jinsabu f’qoxra li tikkonsisti, prinċipalment, f’ġelatina u ppreżentata fil-forma ta’ kapsula.
25 Għaldaqstant, peress li d-domandi kollha magħmula f’dawn it-tliet kawżi huma intiżi sabiex jiddeterminaw, essenzjalment, f’liema intestatura tan-NM għandhom jiġu kklassifikati l-prodotti kkonċernati, hemm lok li tingħata risposta komuni għall-imsemmija domandi.
26 Peress li ma hijiex konvinta mill-klassifikazzjoni tal-oġġetti kkonċernati taħt l‑intestaturi 1515 u 1517 tan-NM, il-qorti tar-rinviju tissuġġerixxi l‑klassifikazzjoni tagħhom taħt l-intestatura 2106 tan-NM. Barra minn hekk, hija tqis li klassifikazzjoni fil-Kapitolu 30 tan-NM ma hijiex rilevanti.
27 Għandu jitfakkar li hija ġurisprudenza stabbilita, li fl-interess taċ-ċertezza legali u tal-faċilità tal-istħarriġ, il-kriterju deċiżiv għall-klassifikazzjoni tariffarja tal‑oġġetti għandu jinsab, b’mod ġenerali, fil-karatteristiċi u l-proprjetajiet oġġettivi tagħha, kif iddefiniti mill-kliem tal-intestatura tan-NM u tan-noti tat‑taqsima jew tal-kapitolu (ara, b’mod partikolari, is-sentenza tat-18 ta’ Ġunju 2009, Kloosterboer Services, C‑173/08, Ġabra p. I‑5347, u l-ġurisprudenza ċċitata).
28 In-Noti ta’ Spjega redatti, għal dak li jikkonċerna n-NM, mill‑Kummissjoni u, għal dak li jikkonċerna s-SA, mill-Organizzazzjoni Dinjija tad-Dwana, jgħinu ħafna fl‑interpretazzjoni tal-portata tad-diversi intestaturi mingħajr, madankollu, ma huma legalment vinkolanti (ara, is-sentenza Kloosterboer Services, iċċitata iktar ‘il fuq, punt 25).
29 Barra minn hekk, l-użu intiż tal-prodott jista’ jikkostitwixxi kriterju oġġettiv ta’ klassifikazzjoni sakemm ikun inerenti għall-imsemmi prodott, u din in-natura inerenti għandha tkun tista’ tiġi evalwata abbażi tal-karatteristiċi u l-proprjetajiet oġġettivi tiegħu (ara s-sentenza tal-11 ta’ Ġunju 2009, Schenker, C‑16/08, Ġabra p. I‑5015, punt 25).
30 F’dan il-każ, kemm mid-deċiżjonijiet tar-rinviju, kif ukoll mill-ispjegazzjonijiet mogħtja minn Swiss Caps matul is-seduta, jirriżulta li l-kapsuli inkwistjoni fit-tliet kawżi prinċipali huma preparazzjonijiet tal-ikel abbażi ta’ żejt tal-annimali jew tal-ħxejjex li jintużaw bħala supplimenti tal-ikel.
31 F’dan ir-rigward, il-kliem tal-intestatura 2106 tan-NM isemmi l-preparazzjonijiet tal-ikel li ma humiex speċifikati jew inklużi band’oħra. In-Noti ta’ Spjega tas-SA għal din l-intestatura jippreċiżaw li din tinkludi, b’mod partikolari, il‑preparazzjonijiet indikati ta’ spiss taħt l-isem ta’ “supplimenti tal-ikel”, ippreżentati f’ippakkjar li jindika li huma intiżi sabiex iżommu l-benesseri tal‑ġisem.
32 F’dan ir-rigward għandu jiġi enfasizzat li l-qoxra li fiha jinżammu ż-żjut inkwistjoni fil-kawżi prinċipali mhijex “ippakkjar” fis-sens tar-regola ġenerali 5. Fil-fatt, dan il-mod ta’ preżentazzjoni taż-żjut inkwistjoni huwa element deċiżiv li juri li jintużaw bħala supplimenti tal-ikel, peress li jiddetermina d-doża tal‑preparazzjonijiet tal-ikel, il-mod kif jiġu assorbiti u l-parti tal-ġisem fejn suppost jibdew jaħdmu. Għaldaqstant, il-qoxra hija element li jiddetermina, flimkien mal-kontenut tagħha, l-użu u n-natura tal-prodotti inkwistjoni fil-kawżi prinċipali.
33 Madankollu, klassifikazzjoni ta’ dawn l-oġġetti taħt l-intestatura 2106 hija possibbli biss jekk il-preparazzjonijiet tal-ikel ikkonċernati ma jkunux speċifikati jew inklużi band’oħra.
34 Fl-ewwel lok, il-konvenut fit-tliet kawżi prinċipali iqis, fil-fatt, li l-oġġetti inkwistjoni għandhom jiġu kklassifikati f’intestatura tal-Kaptiolu 15 tan-NM, jiġifiieri bħala “Xaħmijiet u żjut ta’ annimali jew ħxejjex u prodotti mill-qsim tagħhom; xaħmijiet ippreparati tajbin għall-ikel; xamgħat ta’ l-annimali jew ħxejjex”.
35 Għaldaqstant, l-oġġetti ddefiniti fl-intestaturi 1515 u 1517 tan-NM jirreferu għal xaħmijiet intiżi għal kull tip ta’ użu.
36 Madankollu, minn naħa, il-fatt li l-materja prima li minnha huma komposti l‑preparazzjonijiet tal-ikel inkwistjoni fil-kawżi prinċipali, jiġifieri ż-żjut tal‑annimali jew tal-ħxejjex, huma parzjalment imsemmija fl-intestaturi 1515 u 1517 tan-NM, ma jipprekludix li jiġu klassifikat fl-intestatura 2106, sa fejn, kif ġie enfasizzat fil-punt 32 ta’ din is-sentenza, l-ippakkajar tagħhom f’kapsula jiddetermina kemm il-kontenut, kif ukoll il-karatteristiċi u l-proprjetajiet oġġettivi tagħhom. Madankollu, l-intestaturi 1515 u 1517 tan-NM ma jippermettux li din il‑karatteristika tal-prodotti tittieħed inkunsiderazzjoni.
37 Min-naħa l-oħra, fid-dawl tal-fatt li mir-regola ġenerali 3(a) jirriżulta li l‑intestatura li tagħti l-iżjed deskrizzjoni speċifika għandha tkun ippreferuta minn intestaturi li għandhom portata iktar ġenerali, l-oġġett inkwistjoni fit-tliet kawżi prinċipali jaqgħu taħt l-intestatura 2106 tan-NM, peress li fil-kuntest tal-kawżi prinċipali dawn huma iktar speċifiċi mill-intestaturi 1515 u 1517 tan-NM.
38 Fit-tieni lok, klassifikazzjoni tal-prodotti taħt l-intestatura 3004 tan-NM ma hijiex possibbli sa fejn, kif jirriżulta mill-konstatazzjonijiet tal-qorti tar-rinviju, il‑prodotti inkwistjoni fil-kawżi prinċipali ma humiex intiżi għal użi terapewtiċi jew profilattiċi kif meħtieġ mill-kliem tal-istess intestatura 3004 tan-NM.
39 Fl-aħħar nett, fit-tielet lok, il-fatt li r-Regolament tal-Kummissjoni (KEE) Nru 3513/92, tat-3 ta’ Diċembru 1992, li jikkonċerna l-klassifikazzjoni ta’ ċerta merkanzija fin-nomenklatura magħquda (ĠU Edizzjoni Speċjali bil-Malti, Kapitolu 2, Vol. 4, p. 369) jikklassifika preparazzjoni speċifika ta’ żejt f’kapsula tal-ġelatina fis-subintestatura 1517 90 99 tan-NM, ma jipprekludix il‑klassifikazzjoni tal-oġġetti inkwistjoni fit-tliet kawżi prinċipali, taħt l-intestatura 2106.
40 Fil-fatt, minn naħa, l-imsemmija oġġetti ma humiex identiċi għal dawk imsemmija mir-Regolament Nru 3513/92. Min-naħa l-oħra, ir-Regolament tal-Kummissjoni (KE) Nru 438/2007, tal-20 ta’ April 2007, dwar il-klassifikazzjoni ta’ ċerti merkanziji fin-Nomenklatura Maqgħuda (ĠU L 56M, 2008, p. 313) jipprovdi, għal dak li jikkonċerna l-oġġetti li fil-kompożizzjoni, preżentazzjoni u użu tagħhom jixbhu lil dawk fil-kawżi prinċipali, il-klassifikazzjoni taħt l-intestatura 2106 tan-NM.
41 Għaldaqstant, mill-kunsiderazzjonijiet preċedenti jirriżulta li n-NM li tinsab fl-Anness tar-Regolament Nru 2658/87 għandha tiġi interpretata fis-sens li:
– preparazzjonijiet tal-ikel ippreżentati fil-forma ta’ kapsuli li fihom 600 mg ta’ żejt tal-ħuta konċentrat, ippressat bil-kiesaħ u 22.8 mg Vitamina E konċentrata, f’qoxra li tikkonsisti f’212.8 mg ta’ ġelatina, 77.7 mg ta’ gliċerina u 159.6 mg ta’ ilma msoffi u li jintużaw bħala supplimenti tal-ikel;
– preparazzjonijiet tal-ikel ippreżentati fil-forma ta’ kapsuli li fihom 580 mg ta’ żejt taż-żerriegħa tal-qamħ f’qoxra li tikkonsisti f’250 mg ta’ trab tal‑lamtu u li jintużaw bħala supplimenti tal-ikel;
– preparazzjonijiet tal-ikel ippreżentati fil-forma ta’ kapsuli li fihom 500 mg żejt tal-kemmun iswed, ippressat bil-kiesaħ, 38.7 mg ta’ żejt tas-sojja, 18.8 mg ta’ Vitamina E, 16 mg ta’ xaħam tal-butir, 10 mg ta’ leċitina, 8.2 mg ta’ xama’, 8 mg ta’ pantotenat tal-kalċju, 0.2 mg ta’ aċidu foliku u 0.11 mg ta’ bijotina, f’qoxra li tikkonsisti f’313.97 mg massa ta’ ġelatina (47.3 % ta’ ġelatina, 17.2 % ta’ gliċerina, 35.5 % ta’ ilma), ta’ 4.3 mg ta’ pejst magħmula minn 50 % ta’ diossidu tat-titanju u 50 % ta’ gliċerina u f’1.73 mg ta’ pejst magħmul minn 25 % ta’ laker tal-kinolin isfar u minn 75 % ta’ gliċerina u li jintużaw bħala supplimenti tal-ikel
jaqgħu taħt l-intestatura 2106 tan-NM.
Fuq l-ispejjeż
42 Peress li l-proċedura għandha, fir-rigward tal-partijiet fil-kawża prinċipali, in‑natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal‑osservazzjonijiet lill-Qorti, barra dawk tal-imsemmija partijiet, ma jistgħux jitħallsu lura.
Għal dawn il-motivi, Il-Qorti tal-Ġustizzja, (Il-Ħames Awla) taqta’ u tiddeċiedi:
In-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni, kif emendat mir-Regolament tal-Kummissjoni (KE) Nru 2388/2000, tat-13 ta’ Ottubru 2000, għandha tiġi interpretata fis-sens li:
– preparazzjonijiet tal-ikel ippreżentati fil-forma ta’ kapsuli li fihom 600 mg ta’ żejt tal-ħuta konċentrat, ippressat bil-kiesaħ u 22.8 mg Vitamina E konċentrata, f’qoxra li tikkonsisti f’212.8 mg ta’ ġelatina, 77.7 mg ta’ gliċerina u 159.6 mg ta’ ilma msoffi u li jintużaw bħala supplimenti tal-ikel;
– preparazzjonijiet tal-ikel ippreżentati fil-forma ta’ kapsuli li fihom 580 mg ta’ żejt taż-żerriegħa tal-qamħ f’qoxra li tikkonsisti f’250 mg ta’ trab tal-lamtu u li jintużaw bħala supplimenti tal-ikel;
– preparazzjonijiet tal-ikel ippreżentati fil-forma ta’ kapsuli li fihom 500 mg żejt tal-kemmun iswed, ippressat bil-kiesaħ, 38.7 mg ta’ żejt tas-sojja, 18.8 mg ta’ Vitamina E, 16 mg ta’ xaħam tal-butir, 10 mg ta’ leċitina, 8.2 mg ta’ xama’, 8 mg ta’ pantotenat tal-kalċju, 0.2 mg ta’ aċidu foliku u 0.11 mg ta’ bijotina, f’qoxra li tikkonsisti f’313.97 mg massa ta’ ġelatina (47.3 % ta’ ġelatina, 17.2 % ta’ gliċerina, 35.5 % ta’ ilma), ta’ 4.3 mg ta’ pejst magħmul minn 50 % ta’diossidu tat-titanju u 50 % ta’ gliċerina u f’1.73 mg ta’ pejst magħmul minn 25 % ta’ laker tal-kinolin isfar u minn 75 % ta’ gliċerina u li jintużaw bħala supplimenti tal-ikel
jaqgħu taħt l-intestatura 2106 tal-imsemmija Nomenklatura Magħquda.
Firem
* Lingwa tal-kawża: il-Ġermaniż.
Full & Egal Universal Law Academy