29.3.2008
MT
Il-Ġurnal Uffiċjali ta’ l-Unjoni Ewropea
C 79/29
Rikors ippreżentat fit-18 ta' Jannar 2008 — Liga para a Protecção de Natureza vs Il-Kummissjoni tal-Komunitajiet Ewropej
(Kawża T-29/08)
(2008/C 79/58)
Lingwa tal-kawża: Il-Portugiż
Partijiet
Rikorrenti: Liga para a Protecção de Natureza (LPN) (Liżbona, il-Portugall) (rappreżentant: P. Vinagre e Silva, avukat)
Konvenuta: Il-Kummissjoni tal-Komunitajiet Ewropej
Talbiet tar-rikorrenti
—
tannulla d-deċiżjoni tas-Segretarju Ġenerali tal-Kummissjoni Ewropea li, fit-tweġiba għal applikazzjoni konfermatorja, ċaħad it-talba għal aċċess għad-dokumenti relativi għall-iżvolġiment tax-xogħolijiet ta' kostruzzjoni tad-diga ta' Baixo Sabor, magħmula mil-LPN.
—
tikkundanna lill-Kummissjoni għall-ispejjeż kollha tal-proċeduri.
Motivi u argumenti prinċipali
L-informazzjoni mitluba mil-LPN lill-Kummissjoni, għandha, l-ewwelnett, tiġi kkunsidrata bħala informazzjoni li tista' u għandha titpoġġa għad-dispożizzjoni, fid-dawl ta' l-interessi ambjentali importanti li din l-entità ssostni li tiddefendi u tipproteġi fil-kuntest tal-proġett ta' kostruzzjoni tad-diga ta' Baixo Sabor (Regolamenti Nru 1367/2006 (1) u 1049/2001 (2)).
Il-konfutazzjoni tal-preżunzjoni tas-superjorità ta' l-interess pubbliku involut fl-aċċess (Artikolu 6(1) tar-Regolament Nru 1367/2006) ma teżonerax lill-Kummissjoni milli tikkunsidra, konkretament, is-sustanza tiegħu. Ir-raġunijiet kollha ta' rifjut għandhom dejjem jiġu interpretati ristrettivament mill-Kummissjoni.
Mhux biżżejjed li l-Kummissjoni tinvoka mudell teoretiku skond liema hija l-eċċezzjoni li tipprevali, fl-ispezzjonijiet u l-verifiki, biex tiddeċiedi u tikkonkludi, mingħajr raġunijiet oħra supplimentari u konkreti, mogħtija għal kull dokument, li l-aċċess għad-dokumenti kollha mitluba mil-LPN għandu jiġi rifjutat.
Il-Kummissjoni rrifjutat aċċess parzjali b'motivazzjoni ġenerika, skond liema, ma sar l-ebda sforz biex id-dokumenti jinqasmu f'“partijiet kunfidenzjali u partijiet mhux kunfidenzjali”, billi bbażat ruħha fuq il-preżunzjoni li d-dokumenti kollha relattivi għall-proċeduri ta' spezzjoni u ta' inkjesta huma inaċċessibli. Madankollu, anke f'każ bħal dan, il-Kummissjoni għandha tagħmel evalwazzjoni konkreta ta' l-informazzjoni li tinsab fid-dokumenti li għalihom kien intalab l-aċċess.
(1) Regolament (KE) Nru 1367 tal-Parlament Ewropew u tal-Kunsill, tas-6 ta' Settembru 2006, dwar l-applikazzjoni għall-istituzzjonijiet u l-korpi tal-Komunità tad-disposizzjonijiet tal-Konvenzjoni ta' Aarhus dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta' Deċiżjonijiet u l-Aċċess għall-Ġustizzja fi Kwistjonijiet Ambjentali (ĠU L 264, p. 13).
(2) Regolament (KE) Nru 1049 tal-Parlament Ewropew u tal-Kunsill, tat-30 ta' Mejju 2001, dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni (ĠU L 145, p. 43).
Full & Egal Universal Law Academy