23.11.2013
MT
Il-Ġurnal Uffiċjali tal-Unjoni Ewropea
C 344/13
Sentenza tal-Qorti tal-Ġustizzja (Ir-Raba’ Awla) tas-26 ta’ Settembru 2013 (talba għal deċiżjoni preliminari tal-Consiglio di Giustizia Amministrativa per la Regione siciliana — l-Italja) — Ottica New Line di Accardi Vincenzo vs Comune di Campobello di Mazara
(Kawża C-539/11) (1)
(Artikoli 49 TFUE u 56 TFUE - Libertà ta’ stabbiliment - Saħħa pubblika - Oftalmiċi - Leġiżlazzjoni reġjonali li tissuġġetta l-ftuħ ta’ stabbilimenti ġodda tal-ottika għal awtorizzazzjoni - Limiti demografiċi u ġeografiċi - Ġustifikazzjoni - Abbiltà li l-għan mixtieq jintlaħaq - Koerenza - Proporzjonalità)
2013/C 344/20
Lingwa tal-kawża: it-Taljan
Qorti tar-rinviju
Consiglio di Giustizia Amministrativa per la Regione siciliana
Partijiet fil-kawża prinċipali
Rikorrenti: Ottica New Line di Accardi Vincenzo
Konvenut: Comune di Campobello di Mazara
Fil-preżenza ta’: Fotottica Media Visione di Luppino Natale Fabrizio e C. s.n.c.
Suġġett
Talba għal deċiżjoni preliminari — Consiglio di Giustizia Amministrativa per la Regione siciliana — Interpretazzjoni tal-Artikoli 49 u 56 TFUE kif ukoll tal-Artikolu 2(2)(f) u tal-Artikoli 4(8) u 15 tad-Direttiva 2006/123/KE tal-Parlament Ewropew u tal-Kunsill, tat-12 ta’ Diċembru 2006, dwar is-servizzi fuq is-suq intern (ĠU L 376, p. 36) — Leġiżlazzjoni reġjonali li tissuġġetta l-ftuħ ta’ ħwienet ġodda għall-eżerċizzju tal-professjoni tal-ottika għall-kundizzjonijiet, minn naħa, l-installazzjoni ta’ stabbiliment wieħed biss għal kull parti ta’ popolozzjoni ta’ 8 000 abitant u, min-naħa l-oħra, għall-eżistenza ta’ distanza minima ta’ 300 metru fir-rigward tal-ħwienet tal-ottika eżistenti — Restrizzjoni għal-libertà li jiġu pprovduti servizzi — Raġunijiet imperattivi ta’ interess ġenerali — Ħarsien tas-saħħa — Proporzjonalità
Dispożittiv
L-Artikolu 49 TFUE għandu jiġi interpretat fis-sens li ma jipprekludix leġiżlazzjoni reġjonali, bħal dik inkwistjoni fil-kawża prinċipali, li timponi limiti għall-għoti ta’ awtorizzazzjonijiet ta’ ftuħ ta’ stabbilimenti ġodda tal-ottika, billi tipprovdi li:
—
f’kull żona ġeografika, stabbiliment tal-ottika wieħed biss jista’ jinfetaħ, bħala prinċipju, għal kull porzjon ta’ 8 000 abitant, u
—
kull stabbiliment ġdid tal-ottika għandu josserva, bħala prinċipju, distanza minima ta’ 300 metru fil-konfront tal-istabbilimenti tal-ottika diġà eżistenti,
sakemm l-awtoritajiet kompetenti jagħmlu użu xieraq, billi josservaw kriterji trasparenti u oġġettivi, mill-awtorizzazzjonijiet stipulati mil-leġiżlazzjoni kkonċernata bl-għan li jilħqu, b’mod koerenti u sistematiku, l-għanijiet segwiti minnha tal-protezzjoni tas-saħħa pubblika fit-territorju kollu kkonċernat, u dan huwa l-kompitu tal-qorti nazzjonali li tivverifikah.
(1) ĠU C 370, 17.12.2011
Full & Egal Universal Law Academy