20.7.2013
MT
Il-Ġurnal Uffiċjali tal-Unjoni Ewropea
C 207/8
Appell ippreżentat fil-15 ta’ April 2013 minn Confindustria Venezia, li kienet Unione degli Industriali della Provincia di Venezia (Unindustria) et mid-digriet mogħti mill-Qorti Ġenerali (Ir-Raba’ Awla) fid-29 ta’ Jannar 2013 fil-Kawża T-273/00, Unindustria et vs Il-Kummisjoni Ewropea
(Kawża C-191/13 P)
2013/C 207/13
Lingwa tal-kawża:it-Taljan
Partijiet
Appellanti: Confindustria Venezia, li kienet Unione degli Industriali della Provincia di Venezia (Unindustria) et (rappreżentanti: A. Vianello, A. Bortoluzzi u A. Veronese, avukati)
Partijiet oħra fil-proċedura: Il-Kummissjoni Ewropea, Siram SpA, Bortoli Ettore Srl, Arsenale Venezia SpA, ir-Repubblika Taljana
Talba tal-appellanti
—
tannulla u/jew tirriforma d-digriet tal-Qorti Ġenerali (Ir-Raba’ Awla), mogħti fil-Kawża T-273/00, u tikkundanna lill-Kummissjoni għall-ispejjeż
Aggravji u argumenti prinċipali
Insostenn tal-appell tagħhom, l-appellanti jallegaw żbalji ta’ liġi fl-applikazzjoni tal-prinċipji msemmija mill-Qorti tal-Ġustizzja fis-“Sentenza Comitato Venezia vuole vivere”, minn naħa, fir-rigward tal-obbligu ta’ motivazzjoni tad-deċiżjonijiet tal-Kummissjoni fil-qasam tal-għajnuna mill-Istat, u, min-naħa l-oħra, fir-rigward tat-tqassim tal-oneru tal-prova, għal dak li jirrigwarda l-kundizzjonijiet tal-Artikolu 107(1) TFUE.
Permezz tad-digriet appellat, il-Qorti Ġenerali ma kinitx konformi mas-sentenzi mogħtija mill-Qorti tal-Ġustizzja fil-“Comitato Venezia vuole vivere” tad-9 ta’ Ġunju 2011, meta hija tafferma li d-deċiżjoni tal-Kummissjoni “għandu jkun fiha nfisha l-elementi essenzjali kollha għall-implementazzjoni tagħha mill-awtoritajiet nazzjonali.” Issa, minkejja li d-deċiżjoni kkontestata ma għandhiex l-elementi essenzjali għall-implementazzjoni tagħha mill-awtoritajiet nazzjonali, il-Qorti Ġenerali ma rrilevat ebda nuqqas fil-metodu adottat mill-Kummissjoni fid-deċiżjoni kkontestata, li konsegwentement jirriżulta fi żball ta’ liġi.
Fuq il-bażi tal-prinċipji stabbiliti mill-Qorti tal-Ġustizzja fis-“Sentenza Comitato Venezia vuole vivere”,fil-kuntest tal-irkupru jkun l-Istat Membru– u, għaldaqstant, mhux il-benefiċjarju individwali — li għandu juri, każ b’każ, li l-kundizzjonijiet imsemmija fl-Artikolu 107(1) TFUE huma sodisfatti. Madankollu, f’dan il-każ, il-Kummissjoni fid-deċiżjoni kkontestata naqset li tiċċara l-“mod” ta’ tali verifika; konsegwentement, peress li ma għandhiex l-elementi essenzjali sabiex turi, fil-kuntest tal-irkupru, jekk il-benefiċċji mogħtija jikkostitwixxux għall-benefiċjarji għajnuna mill-Istat, ir-Repubblika Taljana, bil-Liġi Nru 228 tal-24 ta’ Diċembru 2012 (fl-Artikolu 288(351) et seq) iddeċidiet li taqleb l-onus probandi, kuntrarjament għal dak stabbilit fil-ġurisprudenza Komunitarja. Skont il-leġiżlatur Taljan, b’mod partikolari, ma huwiex l-Istat, iżda l-impriżi individwali benefiċjarji tal-għajnuna mogħtija fil-forma ta’ tnaqqis li għandhom jipprovaw li l-benefiċċji inkwistjoni ma joħolqux distorsjoni fil-kompetizzjoni, u lanqas ma jaffettwaw il-kummerċ bejn l-Istati Membri; fin-nuqqas hemm il-preżunzjoni li l-benefiċċju mogħti huwa ta’ natura li joħloq distorsjoni fil-kompetizzjoni u jaffettwa l-kummerċ Komunitarju. Dan kollu huwa evidentement kuntrarju għall-prinċipji stabbiliti mill-Qorti tal-Ġustizzja fis-“Sentenza Comitato Venezia vuole vivere”.
Full & Egal Universal Law Academy