13.4.2015
MT
Il-Ġurnal Uffiċjali tal-Unjoni Ewropea
C 118/12
Appell ippreżentat fil-25 ta’ Novembru 2014 minn Debonair Trading Internacional Lda mis-sentenza mogħtija mill-Qorti Ġenerali (It-Tielet Awla) fit-23 ta’ Settembru 2014 fil-Kawża T-341/13 – Groupe Léa Nature SA vs L-Uffiċċju għall-Armonizzazzjoni fis-Suq Intern (Trade marks u Disinni)
(Kawża C-537/14 P)
(2015/C 118/16)
Lingwa tal-kawża: l-Ingliż
Partijiet
Appellanti: Debonair Trading Internacional Lda (rappreżentanti: D. Selden, avukat, u T. Alkin, barrister)
Partijiet oħra fil-proċedura: L-Uffiċċju għall-Armonizzazzjoni fis-Suq Intern (Trade marks u Disinni), Groupe Léa Nature SA
Talbiet tal-appellanti
—
tannulla d-deċiżjoni tal-Qorti Ġenerali li tannulla d-deċiżjoni tal-Bord tal-Appell;
—
tirrinvija l-kawża lill-Qorti Ġenerali għal eżami mill-ġdid filwaqt li tippreċiża li hemm lok li jiġi kkonstatat li t-trade marks inkwistjoni huma simili; u
—
tikkundanna lill-konvenut għall-ispejjeż kemm tal-proċedura quddiem il-Qorti Ġenerali kif ukoll ta’ dik quddiem il-Qorti tal-Ġustizzja.
Aggravji u argumenti prinċipali
1.
L-appellanti tibbaża ruħha fuq żewġ motivi, li huma ksur tal-Artikoli 8(1)(b) u 8(5) tar-Regolament Nru 207/2009 (1). B’mod sommarju, l-appellanti ssostni li l-Qorti Ġenerali naqset milli tapplika ġurisprudenza stabbilita fl-analiżi tagħha tat-trade marks inkwistjoni bir-riżultat li hija kkonkludiet, b’mod żbaljat, li t-trade marks kienu kompletament ma jixxibhux.
2.
L-ewwel nett, billi kkonkludiet li t-trade marks kienu simili fonetikament permezz tal-element komuni “so”, il-Qorti Ġenerali kellha tikkonkludi li globalment dawk kienu jixxiebhu, tal-inqas f’dak li jikkonċerna dak l-element komuni. Il-konklużjoni tagħha li dawn kienu ma jixxibhux, minkejja l-element fonetiku komuni, kien ir-riżultat ta’ nuqqas ta’ applikazzjoni ta’ ġurisprudenza stabbilita dwar in-natura u l-livell ta’ xebh meħtieġ għall-applikazzjoni tal-Artikoli 8(1)(b) u 8(5).
3.
It-tieni nett, billi qieset li t-trade marks huma simili fonetikament, il-Qorti Ġenerali kellha tikkonkludi li huma kienu simili anki viżwalment, essenzjalment għall-istess raġunijiet (u għaldaqstant, a fortiori, simili fi ħdan it-tifsira tal-Artikoli 8(1)(b) u 8(5)). Il-konklużjoni tagħha li viżwalment dawn ma kinux jixxiebhu, minkejja l-element viżiv komuni “so”, kien ir-riżultat ta’ nuqqas ta’ applikazzjoni ta’ ġurisprudenza stabbilita meta saret l-analiżi tal-impatt viżiv tal-element “so” fi ħdan it-trade marks.
(1) Regolament tal-Kunsill (KE) Nru 207/2009, tas-26 ta’ Frar 2009, dwar it-trade mark Komunitarja (ĠU L 78, p.) (iktar ’il quddiem ir-“Regolament Nru 207/2009”)
Full & Egal Universal Law Academy