14.9.2015
MT
Il-Ġurnal Uffiċjali tal-Unjoni Ewropea
C 302/60
Rikors ippreżentat fit-23 ta’ Ġunju 2015 – Deutsche Edelstahlwerke vs Il-Kummissjoni
(Kawża T-319/15)
(2015/C 302/75)
Lingwa tal-kawża: il-Ġermaniż
Partijiet
Rikorrenti: Deutsche Edelstahlwerke GmbH (Witten, il-Ġermanja) (rappreżentanti: H. Janssen u S. Altenschmidt, avukati)
Konvenuta: Il-Kummissjoni Ewropea
Talbiet
—
tannulla d-deċiżjoni tal-Kummissjoni tal-25 ta’ Novembru 2014 fil-proċedura ta’ għajnuna mill-Istat SA.33995 (2013) (ex 2013/NN) – Il-Ġermanja, Sostenn għal elettriku rinnovabbli u soprataxxa-EEG imnaqqsa għal utenti intensivi tal-enerġija, C(2014) 8786 final, skont l-Artikolu 264 TFUE;
—
tikkundanna lill-konvenuta għall-ispejjeż.
Motivi u argumenti prinċipali
Insostenn tar-rikors tagħha, ir-rikorrenti tinvoka erba’ motivi.
1.
L-ewwel motiv ibbażat fuq ksur tal-Artikolu 107(1) TFUE
Ir-rikorrenti ssostni li s-soprataxxa-EEG imnaqqsa ma tikkostitwixxix għajnuna mill-Istat peress li la kien hemm għoti ta’, u lanqas rinunzja għal, riżorsi Statali. Barra minn hekk, is-soprataxxa-EGG imnaqqsa ma twettqitx b’mod selettiv. Fl-aħħar nett, din ma ħolqotx distorsjoni tal-kompetizzjoni u ma kellhiex effett ħażin fuq il-kummerċ fis-suq intern.
2.
It-tieni motiv ibbażat fuq ksur tal-Artikolu 108(3) TFUE
Fil-każ li, kuntrarjament għall-fehma tar-rikorrenti, ikun hemm inkwistjoni għajnuna mill-Istat, ir-rikorrenti tqis li, fi kwalunkwe każ, il-konvenut ma kellu l-ebda dritt jitlob rimbors abbażi tal-Artikolu 108(3) TFUE. Dan għaliex is-soprataxxa-EEG imnaqqsa ma tikkostitwixxix għajnuna mill-Istat ġdida sa fejn il-leġiżlazzjoni preċedenti tagħha, li l-kontenut tagħha kien identiku fir-rigward ta’ ċerti aspetti essenzjali, kienet diġà ġiet awtorizzata mill-konvenuta fl-2012.
3.
It-tielet motiv ibbażat fuq ksur tal-Artikolu 107(3) TFUE
Barra minn hekk, ir-rikorrenti ssostni li d-deċiżjoni tikser l-Artikolu 107(3) TFUE u l-prinċipju ta’ protezzjoni tal-aspettattivi leġittimi. F’dan ir-rigward, il-konvenuta ma kinitx awtorizzata teżamina l-fatti tal-każ abbażi tal-linji gwida tagħha dwar l-għajnuna mill-Istat għall-protezzjoni tal-ambjent u għall-enerġija fir-rigward tal-perijodu 2014-2020, li ġew ippubblikati għall-ewwel darba fit-28 ta’ Ġunju 2014. Minflok, hija kellha tapplika l-linji gwida li ġew ippubblikati fl-2008. Fuq il-bażi tal-kriterji tal-2008, il-konvenuta ma setgħet tislet ebda konklużjoni oħra għajr dik li l-allegata għajnuna mill-Istat kienet kompatibbli mas-suq intern.
4.
Ir-raba’ motiv ibbażat fuq ksur tal-Artikolu 108(1) TFUE u tal-prinċipju taċ-ċertezza legali
Fl-aħħar nett, ir-rikorrenti ssostni li l-konvenuta kisret il-prinċipju taċ-ċertezza legali kif ukoll l-Artikolu 108(1) TFUE sa fejn adottat id-deċiżjoni kkontestata fil-kuntest ta’ proċedura dwar għajnuna mill-Istat ġdida. Peress li l-konvenuta kienet approvat il-leġiżlazzjoni preċedenti tal-EEG 2012, hija kellha tadotta deċiżjoni fil-kuntest ta’ proċedura dwar għajnuna mill-Istat eżistenti u mhux fil-kuntest ta’ proċedura dwar għajnuna mill-Istat ġdida.
Full & Egal Universal Law Academy