5.10.2015
MT
Il-Ġurnal Uffiċjali tal-Unjoni Ewropea
C 328/11
Rikors ippreżentat fit-2 ta’ Lulju 2015 – Allergopharma vs Il-Kummissjoni
(Kawża T-354/15)
(2015/C 328/10)
Lingwa tal-kawża: il-Ġermaniż
Partijiet
Rikorrenti: Allergopharma GmbH & Co. KG (Reinbek, il-Ġermanja) (rappreżentanti: T. Müller-Ibold u F.-C. Laprévote, avukati)
Konvenuta: Il-Kummissjoni Ewropea
Talbiet
—
tannulla d-deċiżjoni tal-Kummissjoni, tas-27 ta’ Marzu 2015, dwar approvazzjoni ta’ sistema ta’ għajnuna lil impriżi farmaċewtiċi Ġermaniżi f’diffikultà finanzjarja fil-forma ta’ eżenzjoni mill-obbligu ta’ skont fuq il-prezz (SA.34881 (2013/C) (ex 2013/NN) (ex 2012/CP));
—
tikkundanna lill-Kummissjoni Ewropea għall-ispejjeż.
Motivi u argumenti prinċipali
Insostenn tar-rikors, ir-rikorrenti tinvoka erba’ motivi.
1.
L-ewwel motiv, ibbażat fuq żball ta’ liġi u fuq ksur tat-Trattati, tal-projbizzjoni ta’ diskriminazzjoni u tal-prinċipju ta’ aspettattivi leġittimi peress li ma ttiħdux inkunsiderazzjoni l-Linji gwida dwar is-salvataġġ u r-ristrutturazzjoni (1)
—
L-ewwel motiv huwa bbażat fuq il-ksur, min-naħa tad-deċiżjoni, tal-prinċipji ġenerali ta’ ugwaljanza fit-trattament u ta’ protezzjoni tal-aspettattivi leġittimi u fuq żball ta’ liġi inkwantu, b’mod inammissibbli, iddegorat mil-Linji gwida vinkolanti dwar is-salvataġġ u r-ristrutturazzjoni, minkejja li din id-deroga ma hijiex prevista fil-Linji gwida. Il-motivazzjoni fis-sens li l-eżenzjonijiet ma humiex intiżi sabiex iżommu b’mod artifiċjali fis-suq impriżi ineffiċjenti hija żbaljata sa fejn din (i) tiddistingwi bejn impriżi effiċjenti u ineffiċjenti, meta l-Linji gwida ma jagħmlux dan, u (ii) l-interpretazzjoni sottostanti tal-Kummissjoni ta’ “effiċjenza” hija inkompatibbli mal-prinċipji fundamentali tad-dritt tal-għajnuna mill-Istat.
2.
It-tieni motiv, ibbażat fuq żball ta’ liġi, żball ta’ fatt u żball manifest ta’ evalwazzjoni fl-applikazzjoni tal-Artikolu 107(3)(ċ) TFUE
—
It-tieni motiv huwa bbażat fuq il-fatt li d-deċiżjoni, filwaqt li tassumi li l-Kummissjoni tista’ tevalwa direttament l-eżenzjonijiet skont il-kriterju tal-Artikolu 107(3)(c) TFUE, hija vvizzjata b’sensiela ta’ żbalji ta’ liġi u żbalji manifesti ta’ evalwazzjoni, sa fejn ma tiddefinixxix b’mod ċar l-għan tal-għajnuna u, għalhekk, ma tiċċarax għal xiex l-għajnuna hija neċessarja sabiex jintlaħaq dan l-għan. B’mod partikolari, skont ir-rikorrenti, il-Kummissjoni ma ħaditx inkunsiderazzjoni l-fatt li l-għajnuna għall-funzjonament approvata favur impriżi f’diffikultà hija fundamentalment inadegwata, skont il-ġurisprudenza, sabiex jintlaħqu għanijiet ta’ interess komuni u li l-eżenzjonijiet ma għandhom ebda effett ta’ inċentiv.
3.
It-tielet motiv, ibbażat fuq ksur ta’ garanziji proċedurali importanti bħalma huwa d-dritt għal smigħ
—
It-tielet motiv huwa bbażat fuq il-fatt li d-deċiżjoni kkontestata – bi ksur tad-dritt għal smigħ u l-garanziji proċedurali skont l-Artikolu 6(1) tar-Regolament (KE) Nru 659/1999 (2) – teċċedi ferm ir-riżoluzzjoni tal-kwistjonijiet previsti fid-deċiżjoni ta’ ftuħ. Minn naħa, id-deċiżjoni kkontestata twassal għall-konklużjoni li l-evalwazzjoni tal-għajnuna skont il-kriterju tal-Linji gwida dwar is-salvataġġ u r-ristrutturazzjoni ma hijiex proporzjonata, filwaqt li, skont id-deċiżjoni ta’ ftuħ, dan huwa l-“unika bażi legali għall-kompatibbiltà mas-suq intern”. Min-naħa l-oħra, mid-deċiżjoni kkontestata jsegwi li l-evalwazzjoni tal-kompatibbiltà tal-għajnuna direttament skont il-kriterju tal-Artikolu 107(3)(c) TFUE hija eċċezzjonalment proporzjonata, minkejja li d-deċiżjoni ta’ ftuħ ma fiha ebda indikazzjoni fir-rigward ta’ din il-possibbiltà. Dan ċaħħad lir-rikorrenti mill-possibbiltà li tesprimi ruħha dwar tali kwistjonijiet finalment deċiżivi għall-Kummissjoni.
4.
Ir-raba’ motiv, ibbażat fuq ksur tal-obbligu ta’ motivazzjoni
—
Ir-raba’ motiv huwa bbażat fuq il-fatt li d-deċiżjoni kkontestata hija vvizzjata minn difetti serji ta’ motivazzjoni sa fejn, fir-rigward ta’ diversi punti, il-Kummissjoni ma pprovdietx kunsiderazzjonijiet li jistgħu jinftiehmu. B’mod partikolari, hija naqset milli tipprovdi motivazzjoni li tista’ tinftiehem (i) fir-rigward tal-applikazzjoni tad-dispożizzjoni ta’ deroga tal-Artikolu 107(3)(ċ) TFUE u (ii) fir-rigward taċ-ċirkustanzi eċċezzjonali li jiġġustifikaw l-approvazzjoni ta’ għajnuna għall-funzjonament, bħal fil-każ ineżami.
(1) Linji gwida Komunitarji dwar l-għajnuna mill-Istat għas-salvataġġ u għar-ristrutturazzjoni tal-impriżi f’diffikultà (ĠU 2004, C 244, p. 2).
(2) Regolament tal-Kunsill (KE) Nru 659/1999, tat-22 ta’ Marzu 1999, li jistabbilixxi regoli dettaljati għall-applikazzjoni tal-Artikolu 93 tat-Trattat tal-KE (ĠU Edizzjoni Speċjali bil-Malti, Kapitolu 8, Vol. 1, p. 339).
Full & Egal Universal Law Academy