5.10.2015
MT
Il-Ġurnal Uffiċjali tal-Unjoni Ewropea
C 328/24
Rikors ippreżentat fl-4 ta’ Awwissu 2015 – Amrita et vs Il-Kummissjoni
(Kawża T-439/15)
(2015/C 328/23)
Lingwa tal-kawża: it-Taljan
Partijiet
Rikorrenti: Soc. Coop. Amrita arl (Scorrano, l-Italja), Cesi Marta (Alliste, l-Italja), Comune Agricola Lunella – Soc. Mutua Coop Agricola (Galatone, l-Italja), Mustich Loredana Faustina (Lequile, l-Italja), Rollo Olga (Lecce, l-Italja), Borrello Claudia (Salve, l-Italja), Società agricola Merico Maria Rosa di Consiglia, Marta e Vito Lisi (Miggiano, l-Italja), Marzo Luigi (Specchia, l-Italja), Azienda Agricola Piccapane di Pellegrino Giuseppe (Castrignano del Capo, l-Italja), Azienda Agricola Le Lame di Russo Antonello e Russo Gianluigi Ss (Cutrofiano, l-Italja), Lanzieri Ivana (Ugento, l-Italja), Stendardo Giovanni (Presicce, l-Italja), Stasi Anna Maria (Castrignano del Capo, l-Italja), Azienda Agricola Crie di Miggiano Gianluigi (Muro Leccese, l-Italja), Castriota Maria Grazia (Galatone, l-Italja), Gabrieli Tommasi Emanuele (Calimera, l-Italja), Azienda Agricola di Canioni Fiorella (Melendugno, l-Italja), Azienda Agricola Spirdo Ss agricola (Ruffano, l-Italja), Coppola Silvia (Guagnano, l-Italja), Fondazione le Costantine (Uggiano la Chiesa, l-Italja), Impresa Agricola Stefania Stamerra (Lecce, l-Italja), Azienda Agricola Clemente Pezzuto di Pezzuto Francesco (Trepuzzi, l-Italja), Cooperativa Sociale Terrarossa (Tricase, l-Italja), Vaglio Irene (Tricase, l-Italja), Simone Cosimo Antonio (Morciano di Leuca, l-Italja), Azienda Agrituristica “Gli Ulivi” di Baglivo Cesaria (Tricase, l-Italja), Preite Osvaldo (Taurisano, l-Italja), Masseria Alti Pareti Società Agricola arl (Maglie, l-Italja), Società Agricola Li Matonni Sas di Sammarco Ascanio & C. (Erchie, l-Italja) (rappreżentanti: L. Paccione u V. Stamerra, avukati)
Konvenuta: Il-Kummissjoni Ewropea
Talbiet
Ir-rikorrenti jitolbu lill-Qorti Ġenerali jogħġobha tannulla d-deċiżjoni ta’ implimentezzjoni tal-Kummissjoni Ewropea tat-18 ta’ Mejju 2015, ippubblikata fil-Ġurnal Uffiċjali tal-Unjoni Ewropea Nru 125/36 tal-21 ta’ Mejju 2015, dwar “Deċiżjoni ta’ implimentazzjoni tal-Kummissjoni tat-18/05/2015 fir-rigward ta’ miżuri li jipprevjenu l-introduzzjoni u t-tixrid fl-Unjoni tal-Xylella fastidiosa (Wells et al)”, sa fejn hemm bżonn tat-tħassir minn qabel tad-Direttiva tal-Kunsill Nru 2000/29/KE, tat-8 ta’ Mejju 2000, ippubblikata fil-Ġurnal Uffiċjali tal-Unjoni Ewropea Nru 169 tal-10 ta’ Lulju 2000. Bil-konsegwenzi legali kollha anki fir-rigward tal-ispejjeż tal-kawża.
Motivi u argumenti prinċipali
Id-deċiżjoni kkontestata f’din il-kawża hija l-istess bħal dik fil-kawżi T-436/15, ConsorzioVivaisti viticoli pugliesi e Negro vs Il-Kummissjoni, u T-437/15, Eden Green Vivai Piante di Verdesca Giuseppe et vs Il-Kummissjoni.
Insostenn tar-rikors tagħhom, ir-rikorrenti jinvokaw sittax-il motiv.
1.
L-ewwel motiv, ibbażat fuq l-illeġittimità tad-Direttiva 2000/29 minħabba ksur tal-Artikolu 48 TUE fid-dawl tal-Artikolu 3 TFUE u tal-Artikolu 5 TUE, dwar inkompetenza u ksur tal-prinċipju ta’ kooperazzjoni leali.
—
Qed jiġi sostnut f’dan ir-rigward li d-direttiva tagħti lill-Unjoni kompetenza esklużiva li ma hijiex irrikonoxxuta mit-trattati.
2.
It-tieni motiv, ibbażat fuq l-illeġitimità tad-Direttiva 2000/29 minħabba inkompetenza u ksur tal-Artikolu 5 TUE fid-dawl tal-prinċipji ta’ kooperazzjoni leali u ta’ sussidjarjetà.
—
Qed jiġi sostnut f’dan ir-rigward li d-direttiva tagħti lill-Kummissjoni s-setgħa, li ma hijiex irrikonoxxuta mit-trattati, li tħassar il-miżuri adottati mill-Istat Membru fil-qasam tal-leġiżlazzjoni tar-rekwiżiti tas-saħħa tal-pjanti.
3.
It-tielet motiv, ibbażat fuq l-illeġittimità tad-deċiżjoni tal-Kummissjoni 2015/789 minħabba l-illeġittimità tal-imsemmija Direttiva 2000/29 kif indikat fil-punti 1 u 2 preċedenti.
4.
Ir-raba’ motiv ibbażat fuq l-illeġittimità diretta tad-Deċiżjoni 2015/789 minħabba ksur tal-Artikolu 6 TUE fid-dawl tal-prinċipju ta’ effettività tal-protezzjoni ġudizzjarja mogħtija preċedentement lir-rikorrenti mit-tribunal amministrattiv tal-Istat Taljan.
5.
Il-ħames motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Artikolu 5 TUE fid-dawl tal-prinċipji ta’ kooperazzjoni leali u ta’ sussidjarjetà minħabba l-assenza assoluta ta’ motivazzjoni dwar il-punt deċiżiv tal-insuffiċjenza eventwali tal-azzjonijiet kontra l-batterju Xylella fastidiosa min-naħa tal-Istat Membru.
6.
Is-sitt motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Artikolu 5 TUE, fid-dawl tal-prinċipji ta’ proporzjonalità u ta’ prekawzjoni.
—
Qed jiġi sostnut f’dan ir-rigward li l-konklużjoni imposta li tinsab fid-deċiżjoni kkontestata tidher eċċessiva fid-dawl tal-għanijiet iddikjarati.
7.
Is-seba’ motiv, ibbażat fuq l-illeġittimità diretta tad-Deċiżjoni tal-Kummissjoni 2015/789 minħabba ksur tar-regola ISPM Nru 9 fid-dawl tal-Artikolu 5 TUE u l-Protokoll (Nru 2) TFUE dwar l-applikazzjoni tal-prinċipji ta’ proporzjonalità u ta’ prekawzjoni.
8.
It-tmien motiv, ibbażat fuq l-illeġittimità diretta tad-Deċiżjoni 2015/789 sa fejn, bi ksur tal-Artikolu 5 TUE u tal-prinċipju ta’ proporzjonalità stabbilit fih, tindika l-provinċja kollha ta’ Lecce bħala “żona infettata” u żona ta’ mill-inqas 10 kilometri fit-Tramuntana tal-imsemmija provinċja bħala “żona ta’ lqugħ”. Il-miżura kkontestata tikser barra minn hekk il-forom essenzjali tad-deċiżjoni peress li hija nieqsa mill-analiżi u l-motivazzjoni, kif ukoll hija vvizzjata b’fehmiet żbaljati u inġusti.
9.
Id-disa’ motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Artikolu 5 TUE u inkompetenza, peress li huwa biss l-Istat Taljan li seta’ jidentifika u jiddelimita ż-żona infettata eventwali.
10.
L-għaxar motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Artikolu 5 TUE u nuqqas ta’ ġurisdizzjoni sa fejn qed tiġi indikata fiha l-projbizzjoni tħawwil ta’ pjanti esterni fiż-“żona infettata”; u minħabba ksur tal-Artikolu 1 tal-Protokoll addizzjonali għall-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali, peress li l-att ikkontestat jissarraf f’limitazzjoni mhux ikkodifikata tad-drittijiet in rem tar-rikorrenti fuq art agrikola fil-pussess tagħhom.
11.
Il-ħdax-il motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Artikoli 11 u 191 TFUE, minħabba ksur tal-prinċipju ta’ prekawzjoni u tal-Artikolu 5 TUE fid-dawl tad-Direttiva Komunitarja Nru 2001/42, billi l-miżura ta’ qtugħ ta’ pjanti infettati u b’saħħithom f’radju ta’ 100 metru, fl-imkien mal-impożizzjoni ta’ trattamenti għall-protezzjoni tal-pjanti obbligatorji għall-eradikazzjoni tal-insett li jġorr, jikkawża ħsara għall-ambjent u tibdil fil-profil tal-pajsaġġ ta’ Salento fl-assenza tal-evalwazzjoni strateġika ambjentali u tal-eżami tar-riskji fuq l-ambjent u fuq is-saħħa tal-bniedem.
12.
It-tnax-il motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Artikoli 11 u 191 TFUE u tad-Direttiva Komunitarja Nru 43/1992 għaliex il-miżuri adottati ma jevalwawx ir-riskji li qtugħ, eradikazzjoni u prodotti għall-protezzjoni tal-pjanti jista’ jkollhom fuq partijiet tat-territorju protetti b’mod speċjali mid-dritt tal-Unjoni għaliex iddeżinjati bħala żoni ta’ protezzjoni speċjali, parki naturali u siti ta’ interess Komunitarju.
13.
It-tlettax-il motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Konvenzjoni Ewropea dwar il-paesaġġ, iffirmata f’Firenze fl-20 ta’ Ottubru 2000, u minħabba ksur tal-Artikoli 191 u 11 TFUE, fid-dawl tad-Direttiva Komunitarja Nru 43/1992.
—
Qed jiġi sostnut f’dan ir-rigward li l-miżura tal-UE timponi l-qtugħ indiskriminat tas-siġar taż-żebbuġ bl-obbligu ta’ amministrazzjoni ta’ pestiċidi kimiċi strettament ipprojbiti f’agrikoltura bijoloġika, u b’hekk effettivament iġibu l-falliment tal-kumpanniji rikorrenti li ilhom snin jipprattikaw it-tkabbir taż-żebbuġ organiku.
14.
L-erbatax-il motiv, ibbażat fuq l-illeġittimità diretta tad-Deċiżjoni 2015/789 minħabba ksur tar-Regolament 178/2002, tal-Parlament Ewropew u tal-Kunsill, tat-28 ta’ Jannar 2002, u tal-Artikoli 11 u 191 TFUE ukoll fid-dawl tad-Direttiva KE 2009/128, u tal-prinċipju ta’ proporzjonalità u tal-forom proċedurali sostanzjali.
—
Qed jiġi sostnut f’dan ir-rigward li d-Deċiżjoni UE tobbliga lir-rikorrenti jamministraw sustanzi kimiċi li ma humiex awtorizzati fl-agrikoltura bijoloġika u sabiex jaqtgħu l-pjanti anki ssusspettati biss li huma infettati. Tali miżuri jmorru kontra l-indikazzjonijiet tal-opinjonijiet xjentifiċi tal-Awtorità Ewropea dwar is-sigurtà fl-ikel, barra mill-fatt li huma bbażati fuq il-perżważjoni tal-eżistenza ta’ rabta kawżali bejn tnixxif mgħaġġel taż-żebbuġ u l-batterju Xylella, li sa llum għada mhux ipprovata.
15.
Il-ħmistax-il motiv, ibbażat fuq l-illeġittimità diretta tad-Deċiżjoni 2015/789 sa fejn il-Kummissjoni Ewropea, minflok ma adottat miżuri provviżorji ta’ ġestjoni tar-riskju neċessarji sabiex jiġi ggarantit il-livell għoli ta’ ħarsien tas-saħħa, użat approċċ purament ipotetiku tar-riskju li l-Qorti tal-Ġustizzja teskludi tassattivament.
16.
Is-sittax-il motiv, ibbażat fuq l-illeġittimità diretta tad-Deċiżjoni 2015/789 minħabba ksur tal-Artikolu 5 TUE, minħabba ksur tal-forom proċedurali sostanzjali u minħabba ksur tal-prinċipju ta’ proporzjonalità.
—
Qed jiġi sostnut f’dan ir-rigward li l-użu tal-pestiċidi u l-miżura ta’ eradikazzjoni, meqjusa mill-EFSA li huma ineffikaċi u li mhux pratikabbli, ma humiex neċessarji għall-għan li d-dritt tal-UE jrid jilħaq bid-Direttiva 2000/29/KE, u b’hekk tikser il-prinċipju ta’ proporzjonalità.
Full & Egal Universal Law Academy