5.9.2016
MT
Il-Ġurnal Uffiċjali tal-Unjoni Ewropea
C 326/17
Appell ippreżentat fis-7 ta’ Lulju 2016 minn Inclusion Alliance for Europe GEIE mid-digriet mogħti mill-Qorti Ġenerali (Id-Disa’ Awla) fil-21 ta’ April 2016 fil-Kawża T-539/13, Inclusion Alliance for Europe vs Il-Kummissjoni
(Kawża C-378/16 P)
(2016/C 326/29)
Lingwa tal-kawża: it-Taljan
Partijiet
Appellanti: Inclusion Alliance for Europe GEIE (rappreżentant: S. Famiani, avukat)
Parti oħra fil-proċedura: Il-Kummissjoni Ewropea
Talbiet
—
tannulla d-digriet appellat;
—
tikkundanna lill-Kummissjoni għall-ispejjeż.
Aggravji u argumenti prinċipali
B’deċiżjoni ta’ Lulju 2013 il-Kummissjoni Ewropea eżiġiet li Inclusion Alliance for Europe tħallas is-somma globali ta’ EUR 212 411,89 għall-proġetti Nru 224482 (MARE), Nru 216820 (SENIOR), Nru 225010 (ECRN). Inclusion Alliance for Europe ippreżentat rikors għall-annullament ta’ din id-deċiżjoni quddiem il-Qorti Ġenerali li min-naħa tagħha tat digriet skont l-Artikolu 126 tar-Regoli tal-Proċedura tal-Qorti Ġenerali.
Inclusion Alliance for Europe titlob l-annullament, fit-totalità tiegħu, tad-digriet appellat għar-raġunijiet esposti iktar ’il quddiem.
Fid-digriet appellat, fil-kuntest tal-evalwazzjoni tar-rikors kontra d-deċiżjoni tal-Kummissjoni, ma ttiħdux inkunsiderazzjoni u ma ġewx applikati l-prinċipji ġenerali tad-dritt tal-Unjoni.
Il-Qorti Ġenerali żbaljatament qieset li l-argumenti tar-replika kienu motivi ġodda filwaqt li dawn kienu, bil-kontra ta’ dan, kjarifika tal-motivi u tal-argumenti diġa esposti fir-rikors promotur u għalhekk ma hemmx ksur tad-dispożizzjonijiet tal-Artikolu 44(1) tar-Regoli tal-Proċedura tal-Qorti Ġenerali.
Fir-rigward tal-motivi dwar il-prinċipji tad-dritt tal-Unjoni applikabbli għall-proċedura ta’ awditu, il-Qorti Ġenerali ipprovdiet motivazzjoni insuffiċjenti, jekk mhux saħansitra ebda motivazzjoni, peress li żbaljatament insistiet li torbot il-każ inkwistjoni mal-interpretazzjoni/mal-ksur kuntrattwalli minflok ma ħadet inkunsiderazzjoni l-ksur tal-prinċipji ġenerali tad-dritt tal-Unjoni.
Id-digriet appellat jonqos milli jieħu inkunsiderazzjoni u japplika l-prinċipji ġenerali tad-dritt tal-Unjoni fir-rigward tat-talbiet ta’ arrikiment indebitu u ta’ kumpens għad-danni mressqa kontra l-Kummissjoni Ewropea.