6.2.2017
MT
Il-Ġurnal Uffiċjali tal-Unjoni Ewropea
C 38/18
Talba għal deċiżjoni preliminari mressqa mill-Conseil du Contentieux des Étrangers (Il-Belġju) fit-12 ta’ Diċembru 2016 – X, X vs État belge
(Kawża C-638/16)
(2017/C 038/24)
Lingwa tal-kawża: il-Franċiż
Qorti tar-rinviju
Conseil du Contentieux des Étrangers
Partijiet fil-kawża prinċipali
Rikorrenti: X, X
Konvenut: État belge
Domandi preliminari
1)
L-“obbligi internazzjonali”, imsemmija fl-Artikolu 25(1)(a) tar-Regolament Nru 810/2009, tat-13 ta’ Lulju 2009, li jistabbilixxi Kodiċi Komunitarju dwar il-Viżi (1), jirrigwardaw id-drittijiet kollha ggarantiti mill-Karta tad-Drittijiet Fundamentali tal-Unjoni, fosthom, b’mod partikolari, dawk iggarantiti mill-Artikoli 4 u 18, u dawn ikopru wkoll l-obbligi li jorbtu lill-Istati Membri, fir-rigward tal-Konvenzjoni għall-Protezzjoni tad-Drittijiet tal-Bniedem u tal-Libertajiet Fundamentali, u tal-Artikolu 33 tal-Konvenzjoni ta’ Genève dwar l-Istatus tar-Refuġjati?
2)
A.
B’teħid inkunsiderazzjoni tar-risposta mogħtija għad-domanda Nru 1, l-Artikolu 25(1)(a) tar-Regolament Nru 810/2009, tat-13 ta’ Lulju 2009, li jistabbilixxi Kodiċi Komunitarju dwar il-Viżi, għandu jiġi interpretat fis-sens li, bla ħsara għall-marġni ta’ diskrezzjoni li huwa għandu fir-rigward taċ-ċirkustanzi tal-kawża, l-Istat Membru li quddiemu tiġi ppreżentata applikazzjoni għal viża b’validità territorjali limitata, huwa obbligat joħroġ il-viża li għaliha saret applikazzjoni, meta jkun hemm riskju ta’ ksur tal-Artikolu 4 u/jew tal-Artikolu 18 tal-Karta tad-Drittijiet Fundamentali tal-Unjoni, jew ta’ obbligu internazzjonali ieħor tiegħu?
B.
L-eżistenza ta’ rabtiet bejn l-applikant u l-Istat Membru li quddiemu tiġi ppreżentata l-applikazzjoni għal viża (per eżempju, rabtiet familjari, familji ospitanti, garanti u sponsors, eċċ.) taffettwa r-risposta għal din id-domanda?
(1) Regolament (KE) Nru 810/2009 tal-Parlament Ewropew u tal-Kunsill, tat-13 ta’ Lulju 2009, li jistabbilixxi Kodiċi Komunitarju dwar il-Viżi (Kodiċi dwar il-Viżi) (ĠU L 243, p. 1).