25.4.2016
MT
Il-Ġurnal Uffiċjali tal-Unjoni Ewropea
C 145/32
Appell ippreżentat fis-26 ta’ Frar 2016 minn Nicole Clarke, Sigrid Dickmanns u Elisavet Papathanasiou mis-sentenza mogħtija mit-Tribunal għas-Servizz Pubbliku fil-15 ta’ Diċembru 2015 fil-Kawżi Magħquda F-101/14, F-102/14 u F-103/14, Clarke et vs EUIPO
(Kawża T-89/16 P)
(2016/C 145/39)
Lingwa tal-kawża: il-Ġermaniz
Partijiet
Appellanti: Nicole Clarke (Alicante, Spanja), Sigrid Dickmanns (Gran Alacant, Spanja) u Elisavet Papathanasiou (Alicante) (rappreżentant: H. Tettenborn, avukat)
Parti oħra fil-proċedura: L-Uffiċċju tal-Proprjetà Intellettwali tal-Unjoni Ewropea
Talbiet
—
tannulla, fl-intier tagħha, is-sentenza mogħtija mit-Tribunal għas-Servizz Pubbliku tal-Unjoni Ewropea (It-Tielet Awla) fil-15 ta’ Diċembru 2015 fil-Kawżi Magħquda F-101/14, F-102/14 u F-103/14;
—
tiddeċiedi skont it-talbiet tar-rikorrenti ppreżentati f’kull proċedura;
—
tikkundanna lill-EUIPO għall-ispejjeż marbuta mal-proċedura kollha, jiġifieri kemm l-ispejjeż marbuta mal-proċedura quddiem it-Tribunal għas-Servizz Pubbliku tal-UE kif ukoll l-ispejjeż marbuta mal-appell quddiem il-Qorti Ġenerali tal-UE.
Aggravji u argumenti prinċipali
Insostenn tal-appell tagħhom, l-appellanti jinvokaw erba’ aggravji.
1.
L-ewwel aggravju, ibbażat fuq żball ta’ liġi fl-applikazzjoni tal-klawżola ta’ xoljiment inkluża fil-kuntratti tax-xogħol tal-appellanti kif ukoll tal-“protokolli ta’ reintegrazzjoni” konklużi bejn l-EUIPO u l-appellanti, sa fejn il-kompetizzjonijiet inkwistjoni ma humiex il-kompetizzjonijiet “sussegwenti” fis-sens tal-klawżola ta’ xoljiment.
2.
It-tieni aggravju, ibbażat fuq żball ta’ liġi fl-applikazzjoni tal-klawżola ta’ xoljiment inkluża fil-kuntratti ta’ xogħol tal-appellanti, sa fejn il-kompetizzjonijiet preżenti ma jikkonċernawx il-qasam ta’ speċjalizzazzjoni tal-“proprjetà industrijali” li hemm riferiment għalih f’din il-klawżola u għaldaqstant ma jistgħux jinvokaw il-klawżola ta’ xoljiment inkwistjoni.
Fil-kuntest tal-ewwel żewġ aggravji, l-appellanti jallegaw li, fis-sentenza appellata, it-Tribunal għas-Servizz Pubbliku tal-Unjoni Ewropea (iktar ’il quddiem it-“TSP”) interpreta skorrettament il-kliem, is-sens u l-finalità tal-klawżola ta’ xoljiment, kif ukoll il-limitu u l-applikazzjoni ratione temporis;
3.
It-tielet aggravju, ibbażat fuq żball ta’ liġi fl-applikazzjoni tal-Artikolu 8(1) tal-Kondizzjonijiet tal-impjieg applikabbli għall-aġenti l-oħra tal-Unjoni Ewropea (iktar ’il quddiem il-“Kondizzjonijiet tal-impjieg”).
F’dan il-kuntest, l-appellanti jsostnu li, fis-sentenza appellata, it-TSP naqas milli jieħu inkunsiderazzjoni l-fatt li l-“protokolli ta’ reintegrazzjoni” iffirmati mill-EUIPO u mill-appellanti kienu jikkostitwixxu, kull wieħed bħala kuntratt vinkolanti, minn tal-inqas it-tieni tiġdid tal-kuntratti tax-xogħol tagħhom, li kellu jwassal, skont l-ewwel paragrafu tal-Artikolu 8 tal-Kondizzjonijiet tal-impjieg, sabiex il-kuntratti ta’ xogħol tal-appellanti jitqiesu bħala kuntratti għal żmien indeterminat.
4.
Ir-raba’ aggravju, ibbażat fuq ksur tad-dmir ta’ premura u tal-prinċipju ta’ aspettativi leġittimi
L-appellanti jsostnu li, fir-rigward tal-aspett dwar jekk l-EUIPO ssodisfax id-dmir ta’ premura tiegħu jew osservax il-prinċipju ta’ aspettattivi leġittimi, it-TSP żbalja meta rrefera għad-data tar-reintegrazzjoni u mhux għad-data tal-iffirmar tal-klawżola ta’ xoljiment, sa fejn kien biss wara disa’ snin mill-iffirmar tal-klawżola ta’ xoljiment li l-EUIPO organizza kompetizzjoni li kellha tiddetermina l-futur tal-karriera professjonali tal-appellanti.
Full & Egal Universal Law Academy