11.3.2019
MT
Il-Ġurnal Uffiċjali tal-Unjoni Ewropea
C 93/4
Sentenza tal-Qorti tal-Ġustizzja (It-Tielet Awla) tas-17 ta’ Jannar 2019 (talba għal deċiżjoni preliminari tal-Kúria – l-Ungerija) – SH vs TG
(Kawża C-168/17) (1)
((Rinviju għal deċiżjoni preliminari - Politika estera u ta’ sigurtà komuni - Miżuri restrittivi meħuda fid-dawl tas-sitwazzjoni fil-Libja - Sensiela ta’ kuntratti intiżi li jikkostitwixxu garanzija favur entità inkluża f’lista ta’ ffriżar ta’ fondi - Ħlas ta’ spejjeż skont kuntratti ta’ kontrogaranzija - Regolament (UE) Nru 204/2011 - Artikolu 5 - Kunċett ta’ “fondi mqiegħda għad-dispożizzjoni ta’ entità msemmija fl-Anness III tar-Regolament Nru 204/2011” - Artikolu 12(1)(c) - Kunċett ta’ “talba abbażi ta’ garanzija” - Kunċett ta’ ‘persuna jew entità li taġixxi f’isem persuna msemmija fl-Artikolu 12(1)(a) u (b)))
(2019/C 93/05)
Lingwa tal-kawża: l-Ungeriż
Qorti tar-rinviju
Kúria
Partijiet fil-kawża prinċipali
Rikorrent: SH
Konvenut: TG
fil-preżenza ta’: EF
Dispożittiv
1)
L-Artikolu 5(2) tar-Regolament tal-Kunsill (UE) Nru 204/2011 tat-2 ta’ Marzu 2011 dwar miżuri restrittivi fid-dawl tas-sitwazzjoni fil-Libja, għandu jiġi interpretat fis-sens:
—
li għandu japplika f’sitwazzjoni bħal dik inkwistjoni fil-kawża prinċipali, li fiha l-ispejjeż dovuti taħt kuntratt ta’ kontrogaranzija għandhom jitħallsu minn bank tal-Unjoni Ewropea lil bank Libjan li ismu huwa inkluż fuq il-lista li tinsab fl-Anness III ta’ dan ir-regolament, u
—
li bħala prinċipju ma għandux japplika f’sitwazzjoni bħal dik inkwistjoni fil-kawża prinċipali, fejn spejjeż dovuti taħt kuntratt ta’ kontrogaranzija għandhom jitħallsu minn bank tal-Unjoni lil bank Libjan li ismu ma għadux inkluż fuq il-lista li tinsab fl-Anness III ta’ dan ir-regolament jew minn bank tal-Unjoni lil bank ieħor tal-Unjoni, meta l-garanzija bankarja mogħtija mill-bank Libjan tibbenefika lil entità li tinsab f’din il-lista, sakemm tali ħlas ma jwassalx, minħabba rabtiet ġuridiċi jew finanzjarji eżistenti bejn il-bank benefiċjarju ta’ dan il-ħlas u l-entità li tinsab fuq din il-lista, għal tqegħid għad-dispożizzjoni indiretta tal-ispejjeż inkwistjoni favur din l-entità.
2)
L-Artikolu 12 tar-Regolament Nru 204/2011 għandu jiġi interpretat fis-sens li:
—
fil-verżjoni oriġinali tiegħu, għandu japplika meta l-ispejjeż dovuti taħt kuntratti ta’ kontrogaranzija għandhom jitħallsu minn bank tal-Unjoni Ewropea lil bank Libjan inkluż fil-lista li tinsab fl-Anness III ta’ dan ir-regolament kif ukoll minn bank tal-Unjoni lil bank Libjan li ma huwiex inkluż f’din il-lista, meta l-garanzija bankarja mogħtija mill-bank Libjan tibbenefika lil entità li tinsab fl-imsemmija lista, sakemm il-bank Libjan jitqies bħala entità li taġixxi f’isem il-Gvern Libjan, li hija l-qorti tar-rinviju li għandha tivverifika;
—
fil-verżjoni tiegħu li tirriżulta mir-Regolament tal-Kunsill (UE) Nru 45/2014 tal-20 ta’ Jannar 2014, ma japplikax meta l-ispejjeż dovuti taħt kuntratti ta’ kontrogaranzija għandhom jitħallsu minn bank tal-Unjoni lil bank Libjan inkluż fil-lista li tinsab fl-Anness III ta’ dan ir-regolament kif ukoll minn bank tal-Unjoni lil bank Libjan li ma huwiex inkluż f’din il-lista, meta l-garanzija bankarja mogħtija mill-bank Libjan tibbenefika lil entità li tinsab fl-imsemmija lista, peress li dawn l-ispejjeż kienu tħallsu qabel id-dħul fis-seħħ ta’ dan ir-regolament, u
—
kemm fil-verżjoni oriġinali tiegħu kif ukoll fil-verżjoni li tirriżulta mir-Regolament Nru 45/2014, dan ma japplikax meta l-ispejjeż dovuti taħt kuntratti ta’ kontrogaranzija għandhom jitħallsu minn bank tal-Unjoni lil bank ieħor tal-Unjoni.
3)
L-Artikolu 9 tar-Regolament Nru 204/2011 għandu jiġi interpretat fis-sens li ma jistax japplika għall-ħlas tal-ispejjeż bħal dawk dovuti skont il-kuntratti differenti inkwistjoni fil-kawża prinċipali.
4)
L-Artikolu 17(1) tar-Regolament tal-Kunsill (UE) 2016/44 tat-18 ta’ Jannar 2016 dwar miżuri restrittivi fid-dawl tas-sitwazzjoni fil-Libja u li jħassar ir-Regolament (UE) Nru 204/2011, għandu jiġi interpretat fis-sens li japplika għall-ispejjeż ta’ kontrogaranzija dovuti minn bank tal-Unjoni Ewropea lil bank ieħor tal-Unjoni f’sitwazzjoni bħal dik inkwistjoni fil-kawża prinċipali, fejn il-kalkolu finali jsir wara d-dħul fis-seħħ ta’ dan ir-regolament.
(1) ĠU C 221, 10.7.2017.
Full & Egal Universal Law Academy