6.5.2019
MT
Il-Ġurnal Uffiċjali tal-Unjoni Ewropea
C 155/49
Rikors ippreżentat fit-8 ta’ Marzu 2019 — Brunswick Bowling Products vs Il-Kummissjoni
(Kawża T-152/19)
(2019/C 155/59)
Lingwa tal-kawża: l-Ingliż
Partijiet
Rikorrenti: Brunswick Bowling Products LLC (Muskegon, Michigan, l-Istati Uniti) (rappreżentanti: R. Martens u V. Ostrovskis, avukati)
Konvenuta: Il-Kummissjoni Ewropea
Talbiet
Ir-rikorrenti titlob li l-Qorti Ġenerali jogħġobha:
—
tannulla, fl-intier tagħha, id-Deċiżjoni ta’ Implimentazzjoni tal-Kummissjoni (UE) 2018/1960 (1);
—
tikkundanna lill-Kummissjoni għall-ispejjeż kollha.
Motivi u argumenti prinċipali
Insostenn tar-rikors tagħha, ir-rikorrenti tinvoka ħames motivi.
1.
L-ewwel motiv huwa bbażat fuq ksur (i) tar-regoli proċedurali inklużi fl-Artikolu 11 tad-Direttiva 2006/42/KE tal-Parlament Ewropew u tal-Kunsill (2) u fl-Artikolu 18(5) tar-Regolament (KE) Nru 765/2008 tal-Parlament Ewropew u tal-Kunsill (3) u (ii) tal-prinċipju ta’ proporzjonalità kif stipulat fl-Artikolu 18(4) tar-Regolament Nru 765/2008, peress li l-miżura ta’ salvagwardja Svediża ma hijiex iġġustifikata fid-dawl tal-fatt li r-rikorrenti ġiet żgwidata mill-awtoritajiet ta’ sorveljanza tas-suq u miżuri inqas estensivi kienu disponibbli għal finijiet ta’ konformità mad-Direttiva 2006/42/KE.
2.
It-tieni motiv ibbażat fuq ksur tal-prinċipju ta’ ċertezza legali u ta’ aspettattivi leġittimi u tal-prinċipju ta’ amministrazzjoni tajba, peress li l-osservazzjonijiet u l-approċċ sussegwenti tal-awtoritajiet ta’ sorveljanza tas-suq tar-Renju Unit, tal-Ġermanja, tal-Finlandja u tad-Danimarka ma tteħdux inkunsiderazzjoni mill-Kummissjoni u ma ġie previst ebda terminu ta’ implimentazzjoni raġonevoli u effettiv fid-deċiżjoni kkontestata.
3.
It-tielet motiv ibbażat fuq ksur tar-regoli proċedurali inklużi fl-Anness I tad-Direttiva 2006/42/KE, peress li mid-deċiżjoni kkontestata u mid-deċiżjoni tal-Awtorità tal-Ambjent tax-Xogħol Svediża tat-30 ta’ Awwissu 2013 jidher li ma sar ebda riferiment adegwat għall-prinċipju ġenerali tal-aħħar żviluppi fl-eżami tal-prodotti inkwistjoni fuq il-bażi tar-rekwiżiti essenzjali għas-saħħa u għas-sigurtà (“RESS”) stipulati fl-Anness I tad-Direttiva 2006/42/KE.
4.
Ir-raba’ motiv ibbażat fuq l-allegazzjoni li l-Kummissjoni wettqet żball ta’ evalwazzjoni tal-fatti u aġixxiet b’mod li jmur kontra l-prinċipju ta’ amministrazzjoni tajba, peress li ebda informazzjoni neċessarja ma ntalbet mingħand il-manifattur minkejja l-fatt li d-deċiżjoni kkontestata tipprovdi li l-manifattur ma pprovdiex fil-fajl tekniku link bejn ir-referenzi tal-istandards armonizzati u r-RESS rispettivi kif rikjest mill-Anness VII tad-Direttiva 2006/42/KE. Ċertament, amministrazzjoni raġonevoli li taġixxi b’mod diċenti kienet titlob din l-informazzjoni nieqsa qabel ma tagħti deċiżjoni ta’ din il-portata.
5.
Il-ħames motiv ibbażat fuq ksur tal-Artikolu 6 tad-Direttiva 2006/42/KE u tal-prinċipju ta’ trattament ugwali, peress li l-miżura inkwistjoni hija speċifikament intiża għall-prodotti tar-rikorrenti, meta prodotti simili u li huma inqas konformi ta’ manifatturi oħra jeżistu fis-suq intern tal-Unjoni. Barra minn hekk, billi kkunsidrat biss l-irtirar u l-ġbir lura tal-prodotti inkwistjoni, id-deċiżjoni kkontestata toħloq distorsjoni tas-suq, peress li makkinarji simili ta’ manifatturi oħra għadhom permessi fis-suq intern tal-Unjoni.
(1) Deċiżjoni ta’ Implimentazzjoni tal-Kummissjoni (UE) 2018/1960 tal-10 ta’ Diċembru 2018 dwar miżura ta’ salvagwardja meħuda mill-Iżvezja skont id-Direttiva 2006/42/KE tal-Parlament Ewropew u tal-Kunsill, biex tipprojbixxi t-tqegħid fis-suq ta’ tip ta’ magna pinsetter u kitt supplimentari li għandu jintuża flimkien ma’ dik it-tip ta’ magna pinsetter, immanifatturata minn Brunswick Bowling & Billiards, u biex tirtira dawk il-magni li diġà tqiegħdu fis-suq (notifikata bid-dokument C(2018) 8253) (ĠU L 315, 12.12.2018, p. 29).
(2) Direttiva 2006/42/KE tal-Parlament Ewropew u tal-Kunsill tas-17 ta’ Mejju 2006 dwar il-makkinarju, u li temenda d-Direttiva 95/16/KE (ĠU L 157, 9.6.2006, p. 24).
(3) Regolament (KE) 765/2008 tal-Parlament Ewropew u tal-Kunsill tad- 9 ta’ Lulju 2008 li jistabbilixxi r-rekwiżiti għall-akkreditament u għas-sorveljanza tas-suq relatati mal-kummerċjalizzazzjoni ta’ prodotti, u li jħassar ir-Regolament tal-Kunsill (KEE) Nru 339/93 (ĠU L 218, 13.8.2008, p. 30).
Full & Egal Universal Law Academy