Sentenza tal-Qorti Ġenerali (It-Tielet Awla) tat-12 ta’ Jannar 2005.Deutsche Post EURO EXPRESS GmbH vs L-Uffiċċju tal-Proprjetà Intellettwali tal-Unjoni Ewropea.Kawża T-334/03.

SENTENZA TAL-QORTI TAL-PRIM'ISTANZA (It-Tielet Awla)

12 ta' Jannar 2005(*)

"Trade mark Komunitarja – Sinjal verbali EUROPREMIUM – Raġuni assoluta għal rifjut – Natura deskrittiva – Artikolu 7(1)(ċ) tar-Regolament Nru 40/94 KE"

Fil-kawża T-334/03,

Deutsche Post EURO EXPRESS GmbH, inizjalment irrappreżentata mis-Sinjura G. Lindhofer, imbagħad minn K-U. Jonas, Avukati, b'indirizz għan-notifika fil-Lussemburgu,

rikorrenti,

vs

L-Uffiċċju għall-Armonizzazzjoni fis-Suq Intern (Trade marks u Disinji) (UASI), inizjalment irrappreżentat minn U. Pfleghar u G. Schneider, imbagħad minn A. von Mühlendahl u G. Schneider, bħala aġenti,

konvenut,

li għandha bħala suġġett rikors imressaq kontra d-deċiżjoni tar-Raba' Bord ta’ l-Appell ta’ l-UASI ta' l-20 ta’ Ġunju 2003 (kawża R 348/2002-4), dwar ir-reġistrazzjoni tas-sinjal verbali EUROPREMIUM bħala trade mark Komunitarja,

 

IL-QORTI TAL-PRIM'ISTANZA TAL-KOMUNITAJIET EWROPEJ (It-Tielet Awla),

komposta minn J. Azizi, President, M. Jaeger u O. Czúcz, Imħallfin,

Reġistratur: B. Pastor, Assistent Reġistratur,

wara r-rikors ippreżentat fir-Reġistru tal-Qorti tal-Prim’Istanza fid-29 ta’ Settembru 2003,

wara li rat ir-risposta ppreżentata fir-Reġistru tal-Qorti tal-Prim’Istanza fit-23 ta' Jannar 2004,

wara s-seduta tat-29 ta' Settembru 2004,

tagħti l-preżenti

Sentenza

 Il-fatti li wasslu għal-kawża

1       Fl-24 ta' Marzu 2000, ir-rikorrenti ppreżentat applikazzjoni għal trade mark Komunitarja fl-Uffiċċju għall-Armonizzazzjoni fis-Suq Intern (Trade marks u Disinji) (UASI), skond ir-Regolament tal-Kunsill (KE) Nru 40/94, ta’ l-20 ta’ Diċembru 1993, dwar it-trade mark Komunitarja (ĠU L 11, 1994 p. 1), kif emendat.

2       It-trade mark li għaliha saret l-applikazzjoni għal reġistrazzjoni hija s-sinjal verbali EUROPREMIUM.

3       Il-prodotti u servizzi li għalihom saret l-applikazzjoni għal reġistrazzjoni jaqgħu taħt il-klassijiet 16, 20, 35 u 39 fis-sens tal-Ftehim ta' Nizza dwar il-klassifikazzjoni internazzjonali tal-prodotti u servizzi għall-finijiet tar-reġistrazzjoni tat-trade marks, tal-15 ta' Ġunju 1957, hekk kif irrivedut u emendat, u jikkorrispondu għad-deskrizzjoni li ġejja:

–       klassi 16: "Karti, kartunċin u oġġetti magħmula minn dawn il-materjali [...], b'mod partikolari karta għall-ippakkjar, basktijiet tal-karti, envelops tal-karti; kartun u prodotti tal-kartun, jiġifieri kartunċin, kartunċin għall-ippakkjar u envelops tal-kartun għat-trasport ta' merkanzija ta' kull tip; materjal stampat; gazzetti, opuskuli, perjodiċi u kotba; tikketti (mhux f'materjal); materjal istruttiv u ghat-tagħlim (ħlief apparat) fuq it-trasport ta' pakketti u ittri mibgħuta; materjali tal-plastik ghall-ippakkjar, b'mod partikolari materjali tal-plastik ghall-ippakkjar li huwa air-cushioned, basktijiet, filmijiet, envelops u basktijiet tal-plastik għall-ippakkjar; materjali tal-plastik ghall-ippakkjar, kontenituri magħmula mill-plastik [...]";

–       klassi 20: "Oġġetti ta' l-injam, sufra, qasba, qasba tal-bambù, wicker, qarn, għadma, avorju, whalebone, qoxra, ambra, madreperla, meerschaum u sostituti għal dawn il-materjali, jew tal-plastik [...]; b'mod partikolari kontenituri jew ippakkjar ta' l-injam jew tal-plastik (mhux tal-metall) għat-trasport ta' merkanzija ta' kull tip, materjal tal-plastik għall-ippakkjar, film tal-plastik għall-ippakkjar, basktijiet tal-plastik, kaxxi għall-ġarr, ċestuni u paletti ta' l-injam jew tal-plastik, kaxxi, kaxxi għall-ġarr u ċestuni b'għatu jew mingħajr għatu, xkaffi għall-ippostjar, kavalletti, għotjien ta' kontenituri, artikoli ta' dekorazzjoni għall-użu alimentari (tal-plastik), kaxxetti b'għotjien, kontenituri, reċipjenti għat-trasport, bittiji, bramel, tankijiet, basktijiet, kaxxi għall-fliexken";

–       klassi 35: Reklamar, ġestjoni ta' negozju, amministrazzjoni kummerċjali, funzjonijiet ta' uffiċċju; b'mod partikolari organizazzjoni ta' fieri u ta' wirjiet [...]; monitoraġġ bil-kompjuter ta' merkanzija u ta' pakketti matul it-trasport tagħhom; għajnuna fil-ġestjoni, jiġifieri għajnuna għat-tmexxija tan-negozju; konsulenza ta' ġestjoni; aġenziji għal impjieg temporanju; iffinalizzar ta' statistiċi; żamma ta' kotba kontabbli; servizzi ta' bejgħ bl-irkant; investigazzjonijiet għal negozju; marketing; studji ta' suq u analiżi ta' suq, stħarriġ dwar opinjonijiet; dekorazzjonijiet ta' vitrini; konsulenza kummerċjali; konsulenza għal organizzazzjoni; servizzi ta' konsulenza u ta' pariri għan-negozju; konsulenza dwar il-persunal; kiri ta' magni u tagħmir għall-uffiċċju; medjazzjoni u konklużjoni ta' tranżazzjonijiet kummerċjali f'isem terzi; medjazzjoni ta' kuntratti ta' xiri u bejgħ ta' merkanzija; distribuzzjoni ta' merkanzija għall-finijiet ta' reklamar; riproduzzjoni ta' dokumenti; reklamar; reklamar radjufoniku u televiżiv; reklamar ċinematografiku";

–       klassi 39: "Trasport u ħżin; is-servizzi kollha inklużi fil-klassi 39 [...], b'mod partikolari trasport, ħżin, ġbir, ippakkjar, magazinaġġ, kunsinna u monitoraġġ elettroniku ta' l-ispedizzjoni ta' ittri, dokumenti, komunikazzjonijiet, aħbarijiet, stampati, pakketti u merkanzija oħra, servizzi bil-posta internazzjonali, jiġifieri trasferiment transkonfinali u individwali ta' ittri, dokumenti u dokumenti oħra permezz tal-kurjers li jikkonsenjaw bieb bieb bl-għajnuna ta' vetturi awtomobilistiċi, ferroviji, vapuri u ajruplani; servizzi marbuta mat-trasport tal-prodotti msemmija iktar 'il fuq, jiġifieri magazinaġġ u ħżin, ippakkjar u kunsinna, trasport ta' merkanzija bl-għajnuna ta' vetturi awtomobilistiċi, ferroviji, vapuri u ajruplani; tagħbija u ħatt ta' vapuri, salvataġġ ta' vapuri u ta' tagħbija ta' vapuri, ġarr, ħżin ta' merkanzija, għamara, trasport ta' flus u ta' oġġetti ta' valuri, servizzi ta' intermedjarju għat-trasport".

4       B'deċiżjoni tal-21 ta' Frar 2002, l-eżaminatur irrifjuta l-applikazzjoni skond l-Artikolu 38 tar-Regolament Nru 40/94, għar-raġuni li s-sinjal verbal li għalih saret applikazzjoni kien deskrittiv tal-prodotti u servizzi kkonċernati u bla ebda natura distintiva, fis-sens ta' l-Artikolu 7(1)(b) u (ċ) ta' l-imsemmi Regolament.

5       Fit-22 ta' April 2002, ir-rikorrenti ppreżentat appell mid-deċiżjoni ta' l-eżaminatur quddiem l-UASI, skond l-Artikoli 57 sa 62 tar-Regolament Nru 40/94.

6       B'deċiżjoni ta' l-20 ta' Ġunju 2003 (iktar 'il quddiem id-"deċiżjoni kkontestata"), ir-Raba' Bord ta' l-Appell ta' l-UASI ċaħad l-appell għar-raġuni li l-Artikolu 7(1)(ċ) tar-Regolament Nru 40/94 kien jipprekludi r-reġistrazzjoni tat-trade mark EUROPREMIUM, peress li din ta' l-aħħar setgħet tiġi pperċepita mill-konsumaturi bħala indikazzjoni tal-kwalità rimarkevoli u ta' l-oriġini Ewropea tal-prodotti u servizzi koperti bl-applikazzjoni għat-trade mark.

 It-talbiet tal-partijiet

7       Fir-rikors tagħha, ir-rikorrenti titlob lill-Qorti tal-Prim'Istanza:

–       tannulla d-deċiżjoni kkontestata safejn, fl-opinjoni tagħha, l-UASI jqis, fl-imsemmija deċiżjoni, li t-trade mark Komunitarja EUROPREMIUM ma tissodisfax il-kundizzjonijiet ta' l-Artikolu 7(1)(b) u (ċ) tar-Regolament Nru 40/94;

–       tordna li tiġi ppubblikata l-applikazzjoni għat-trade mark Komunitarja EUROPREMIUM skond l-Artikolu 40 tar-Regolament Nru 40/94;

–       sussidjarjament, tirrinvija l-kawża quddiem il-Bord ta' l-Appell;

–       tordna lill-UASI jbati l-ispejjeż.

8       L-UASI jitlob lill-Qorti tal-Prim'Istanza:

–       tiddikjara inammissibbli t-talbiet li jirrigwardaw, rispettivament, l-annulament tad-deċiżjoni kkontestata safejn fiha kienet ġiet irrifjutata r-reġistrazzjoni tat-trade mark skond l-Artikolu 7(1)(b) tar-Regolament Nru 40/94, l-ordni lill-UASI li tippubblika l-applikazzjoni għall-imsemmija trade mark u r-rinviju tal-kawża quddiem il-Bord ta' l-Appell;

–       tiċħad ir-rikors għall-bqija;

–       tordna lir-rikorrenti tbati l-ispejjeż.

9       B'ittra ta' l-20 ta' Settembru 2004, ir-rikorrenti rtirat it-tieni u t-tielet talba tagħha.

10     Waqt is-seduta, ir-rikorrenti ppreċiżat li r-rikors tagħha kien intiż għall-annullament tad-deċiżjoni kkontestata safejn l-UASI kien qies fl-imsemmija deċiżjoni li t-trade mark Komunitarja EUROPREMIUM ma kinitx tissodisfa l-kundizzjonijiet ta' l-Artikolu 7(1)(ċ) tar-Regolament Nru 40/94.

 Fid-dritt

11     B'sostenn tar-rikors tagħha, ir-rikorrenti tqajjem motiv wieħed biss, ibbażat fuq il-ksur ta' l-Artikolu 7(1)(ċ) tar-Regolament Nru 40/94.

 L-argumenti tal-partijiet

12     Ir-rikorrenti tenfasizza li l-element determinanti ta' trade mark jikkonsisti fil-kapaċità tagħha li tiddistingwi l-prodotti ta' impriża minn dawk ta' impriża oħra u tfakkar li l-evalwazzjoni tan-natura distintiva ta' sinjal għandha ssir b'riferiment għar-rabta bejn is-sinjal u prodott jew servizz speċifiku u mhux b'mod astratt.

13     Hija ssostni li trade mark għandha tiġi rreġistrata meta hija mhijiex, jekk wieħed jeżaminaha fil-ġeneralità tagħha, esklużivament deskrittiva. Hija tafferma li sinjal distintiv li jista' jiġi mifhum b'mod ieħor milli bħala d-deskrizzjoni tal-prodott jew ta' waħda mill-kwalitajiet tiegħu mhuwiex esklużivament deskrittiv u, għaldaqstant, ikun kapaċi jikkostitwixxi trade mark.

14     Hija żżid li l-kelma "europremium" għandha diversi tifsiriet u għandha, għaldaqstant, titqies bħala distintiva.

15     Waqt is-seduta, ir-rikorrenti invokat is-sentenza tal-Qorti tal-Prim'Istanza tad-9 ta' Ottubru 2002, Dart Industries vs L-UASI (UltraPlus) (T-360/00, Ġabra p. II-3867). Hija tfakkar li l-Qorti tal-Prim'Istanza ddeċidiet f'din is-sentenza li l-fatt li impriża tiftaħar, indirettament u b'mod astratt, bl-eċċellenza tal-prodotti tagħha permezz tas-sinjal UltraPlus mingħajr madankollu ma tinforma direttament u immedjatament il-konsumatur ta' waħda mill-karatteristiċi speċifiċi tal-prodotti in kwistjoni jaqa' taħt l-evokazzjoni u mhux id-deskrizzjoni fis-sens ta' l-Artikolu 7(1)(ċ) tar-Regolament Nru 40/94 (punt 27 tas-sentenza). Ir-rikorrenti tfakkar li, f'din is-sentenza, il-Qorti tal-Prim'Istanza kienet annullat id-deċiżjoni kkontestata billi indikat li, billi ma bbażax l-analiżi tiegħu fuq il-prodotti kkonċernati u billi ma weriex li s-sinjal verbali in kwistjoni seta' jservi sabiex jindika direttament il-prodotti kkonċernati, il-Bord ta' l-Appell kien kiser l-Artikolu 7(1)(ċ) tar-Regolament Nru 40/94 (punt 29 tas-sentenza).

16     Ir-rikorrenti tqis li, f'din il-kawża, l-UASI għamel l-istess żball bħal dak li l-Qorti tal-Prim'Istanza kienet ikkonstatat f'din is-sentenza meta qies li EUROPREMIUM huwa deskrittiv tal-prodotti u servizzi koperti fl-applikazzjoni għal reġistrazzjoni meta ma teżistix rabta diretta u konkreta bejn dawn ta' l-aħħar u s-sinjal verbali in kwistjoni.

17     L-UASI jqis li l-Bord ta' l-Appell iddeċieda ġustament li s-sinjal verbali EUROPREMIUM huwa indikazzjoni deskrittiva li r-reġistrazzjoni tiegħu bħala trade mark għandha tiġi rrifjutata. Huwa jfakkar li, b'mod konformi mas-sentenza tal-Qorti tal-Prim'Istanza ta' l-20 ta' Marzu 2002, DaimlerChrysler vs L-UASI (CARCARD) (T-356/00, Ġabra p. II‑1963, punt 30), sabiex tiġi rrifjutata r-reġistrazzjoni skond l-Artikolu 7(1)(ċ) tar-Regolament Nru 40/94, is-sinjal verbali għandu, f'almenu waħda mit-tifsiriet potenzjali tiegħu, jindika karatteristika tal-prodotti jew servizzi kkonċernati.

18     L-UASI jsostni li abbinament ta' kliem li jibdew bil-kelma "euro" għandu jiġi mifhum li jirreferi għall-Ewropa u mhux għall-euro bħala munita unika. Rigward il-kelma "premium", huwa jsostni li din hija kelma Ingliża, ta' oriġini Latina, li tintuża f'lingwi oħra ta' l-Unjoni Ewropea u li tfisser "ta' kwalità partikolari" jew "ta' kwalità għolja". Huwa jqis li dawn iż-żewġ tifsiriet huma ovvji għall-konsumaturi kkonċernati. Minn dan jirriżulta li l-konsumaturi jipperċepixxu s-sinjal verbali in kwistjoni bħala wieħed li jindika oġġetti ta' oriġini Ewropea u ta' kwalità għolja.

19     L-UASI jsostni, barra minn hekk, li l-indikazzjonijiet deskrittivi mhumiex biss indikazzjonijiet li l-eżattezza tal-kontenut tagħhom tista' tiġi vverifikata iżda wkoll indikazzjonijiet li jillimitaw ruħhom għal tifħir ġenerali rigward il-kwalità jew karatteristiċi oħra tal-prodott. Huwa jikkunsidra li s-sinjal li għalih saret applikazzjoni għal reġistrazzjoni jiddeskrivi l-prodotti u servizzi in kwistjoni, jew almenu waħda mill-karatteristiċi tagħhom, b'mod preċiż biżżejjed sabiex l-Artikolu 7(1)(ċ) tar-Regolament Nru 40/94 jista' jiġi applikat.

20     Waqt is-seduta, l-UASI invoka żewġ sentenzi tal-Qorti tal-Ġustizzja tat-12 ta' Frar 2004, Campina Melkunie (C-265/00, li għadha ma ġietx ippubblikata fil-Ġabra), u Koninklijke KPN Nederland (C-363/99, li għadha ma ġietx ippubblikata fil-Ġabra), dwar l-interpretazzjoni ta' l-Artikolu 3(1)(ċ) ta' l-ewwel Direttiva tal-Kunsill 89/104/KEE, tal-21 ta’ Diċembru 1988, biex jiġu approssimati l-liġijiet ta’ l-Istati Membri dwar it-trade marks (ĠU L 40, 1989, p. 1), li huwa fformulat fi kliem kważi identiku għal dak ta' l-Artikolu 7(1)(c) tar-Regolament Nru 40/94. F'dawn is-sentenzi, il-Qorti tal-Ġustizzja indikat li l-Artikolu 3(1)(ċ) tad-Direttiva 89/104 għandu jiġi interpretat fis-sens li trade mark magħmula minn kelma jew neoloġiżmu magħmul minn elementi li kull wieħed minnhom huwa deskrizzjoni ta' karatteristiċi tal-prodotti jew servizzi li għalihom saret applikazzjoni għal reġistrazzjoni hija fiha nnifisha deskrittiva, ħlief jekk teżisti differenza perċettibbli bejn il-kelma u n-neoloġiżmu u s-sempliċi somma ta' l-elementi li jiffurmawha (rispettivament punti 43 u 104 tas-sentenzi).

21     L-UASI jqis li, billi s-sinjal verbali EUROPREMIUM huwa fformat minn żewġ elementi deskrittivi u mhemmx marġni perċettibbli bejn dan is-sinjal u s-somma sempliċi ta' l-elementi li jikkomponuh, il-Bord ta' l-Appell, ġustament, irrifjuta li jirreġistra din it-trade mark.

 Il-kunsiderazzjonijiet tal-Qorti tal-Prim'Istanza

22     Skond l-Artikolu 7(1)(ċ) tar-Regolament Nru 40/94, "trade marks li jikkonsistu esklużivament f’sinjali jew indikazzjonijiet li jintużaw fil-kummerċ sabiex jindikaw ix-xorta, il-kwalità, il-kwantità, l-użu intenzjonat, il-valur, l-oriġini ġeografika jew il-ħin ta’ produzzjoni tal-prodotti jew ta’ meta ngħata s-servizz, jew karatteristiċi oħrajn tal-prodotti jew servizzi" m'għandhomx jiġu rreġistrati. Barra minn hekk, l-Artikolu 7(2) tar-Regolament Nru 40/94 jipprovdi li l-"paragrafu 1 għandu japplika minkejja li r-raġunijiet li jwasslu biex trade mark ma tiġix irreġistrata japplikaw biss f’parti tal-Komunità."

23     L-Artikolu 7(1)(ċ) tar-Regolament Nru 40/94 jipprojbixxi li s-sinjali jew indikazzjonijiet li huma msemmija fih huma rriżervati għal impriża waħda biss minħabba r-reġistrazzjoni tagħhom bħala trade mark. Din id-dispożizzjoni għandha għalhekk għan ta' interess ġenerali, li jeżiġi li sinjali jew indikazzjonijiet bħal dawn jistgħu jiġu liberament użati minn kulħadd [ara, f'dan is-sens, is-sentenza tal-Qorti tal-Ġustizzja ta' l-4 ta' Mejju 1999, Windsurfing Chiemsee, C-108/97 u C-109/97, Ġabra p. I‑2779, punt 25; is-sentenzi tal-Qorti tal-Prim'Istanza tas-27 ta' Frar 2002, Streamserve vs L-UASI (STREAMSERVE), T-106/00, Ġabra p. II-723, punt 36, u CARCARD, punt 17 iktar 'il fuq, punt 24].

24     Issa, is-sinjali u l-indikazzjonijiet imsemmija fl-Artikolu 7(1)(ċ) tar-Regolament Nru 40/94 huma biss dawk li jistgħu jservu, f'użu normali mill-perspettiva tal-pubbliku mmirat, sabiex jindikaw direttament jew permezz li tissemma waħda mill-karatteristiċi essenzjali tagħhom, il-prodott jew is-servizz li għalih intalbet ir-reġistrazzjoni (is-sentenza tal-Qorti tal-Ġustizzja ta' l-20 ta' Settembru 2001, Procter & Gamble vs l-UASI, C-383/99 P, Ġabra p. I-6251, punt 39).

25     Minn dan jirriżulta li, sabiex sinjal jaqa' taħt il-projbizzjoni msemmija f'din id-dispożizzjoni, jeħtieġ li huwa jippreżenta rabta suffiċjentement diretta u konkreta mal-prodotti jew servizzi kkonċernati ta' natura li tippermetti lill-pubbliku kkonċernat li jipperċepixxi immedjatament, u mingħajr ħsieb ieħor, deskrizzjoni tal-kategorija ta' prodotti u servizzi in kwistjoni jew ta' waħda mill-karatteristiċi tagħhom [ara, f'dan is-sens, is-sentenzi tal-Qorti tal-Prim'Istanza tas-7 ta' Ġunju 2001, DKV vs L-UASI (EuroHealth) T-359/99, Ġabra p. II-1645, punt 36; Ultraplus, punt 15 iktar 'il fuq, punt 26, u ta' l-20 ta' Lulju 2004, Lissotschenko u Hentze vs L-UASI (LIMO), T-311/02, li għadha ma ġietx ippubblikata fil-Ġabra, punt 30].

26     Għaldaqstant, l-evalwazzjoni tan-natura deskrittiva ta' sinjal ma tistax issir ħlief, minn naħa, f'relazzjoni mal-prodotti jew servizzi kkonċernati u, min-naħa l-oħra, f'relazzjoni mal-mod kif il-pubbliku mmirat jifhem l-imsemmi sinjal (sentenza CARCARD, punt 17 iktar 'il fuq, punt 25, u UltraPlus, punt 15 iktar 'il fuq, punt 22).

27     F'din il-kawża, il-prodotti u servizzi li għalihom saret applikazzjoni għal reġistrazzjoni huma, b'mod partikolari, il-prodotti magħmula minn diversi materjali intiżi għall-ippakkjar, għall-ippostjar jew għat-trasport, servizzi ta' reklamar, ġestjoni jew assistenza kummerċjali u servizzi ta' trasport u ħżin.

28     Rigward il-pubbliku mmirat, il-Bord ta' l-Appell kkonstata li l-pubbliku rilevanti kien il-pubbliku ġenerali (punt 9 tad-deċiżjoni kkontestata). Il-Qorti tal-Prim'Istanza tikkunsidra f'dan ir-rigward li, billi l-prodotti u s-servizzi kkonċernati huma intiżi għall-konsumaturi kollha, din l-analiżi tal-Bord ta' l-Appell hija eżatta. Barra minn hekk, l-eżistenza tar-raġuni assoluta għal rifjut ikkonċernata f'dan il-każ ġiet imqajma biss, kif ikkonfermah l-UASI f'risposta għad-domandi tal-Qorti tal-Prim'Istanza, għal waħda mil-lingwi mitkellma fil-Komunità, jiġifieri l-lingwa Ingliża (punt 10 tad-deċiżjoni kkontestata). B'hekk, b'applikazzjoni ta' l-Artikolu 7(2) tar-Regolament Nru 40/94, il-pubbliku rilevanti li fir-rigward tiegħu għandha tiġi evalwata r-raġuni assoluta għal rifjut għandu jiġi evalwat huwa l-konsumatur medju Anglofonu (ara, f'dan is-sens, is-sentenza tal-Qorti tal-Prim'Istanza tas-27 ta' Frar 2002, Ellos vs L-UASI (ELLOS), T-219/00, Ġabra p. II-753, punt 31).

29     Fir-rigward tat-tifsira tal-kelma "europremium", mill-punti 10 u 11 tad-deċiżjoni kkontestata jirriżulta li, għall-UASI, il-prefiss "euro" huwa mifhum bħala riferiment għall-aġġettiv "Europew" u li "premium" tfisser, bl-Ingliż, "ta' kwalità għolja" u li, għaldaqstant, il-kelma komposta kkrejata b'dan il-mod tqajjem f'moħħ il-konsumatur l-impressjoni li dawn huma prodotti jew servizzi ta' kwalità u li joriġinaw mill-Ewropa.

30     F'dan ir-rigward, il-fatt li, kif tallega r-rikorrenti, il-kelma "europremium" m'għandhiex tifsira ċara u speċifika ma jistax jaffettwa l-evalwazzjoni tan-natura deskrittiva tagħha. Fil-fatt, għandu jiġi mfakkar li, sabiex jaqa' taħt l-Artikolu 7(1)(ċ) tar-Regolament Nru 40/94, huwa biżżejjed li sinjal verbali, f'almenu waħda mit-tifsiriet possibbli tiegħu, jindika karatteristika tal-prodotti jew servizzi kkonċernati (is-sentenza CARCARD, punt 17 iktar 'il fuq, punt 30). B'hekk, għalkemm huwa minnu li l-kelma "premium" għandha tifsiriet oħra u li jista' jkun li l-introduzzjoni tal-munita waħda setgħet biddlet, anki f'pajjiżi li ma jagħmlux parti mill-Unjoni ekonomika u monetarja, il-mod kif il-pubbliku mmirat jista' jifhem il-prefiss "euro", il-Qorti tal-Prim'Istanza tista' biss tikkonstata li t-tifsira adottata mill-Bord ta' l-Appell hija waħda mit-tifsiriet possibbli tal-kelma "europremium".

31     Fir-rigward tar-rabta eżistenti bejn il-kelma "europremium" u l-prodotti u s-servizzi kkonċernati, il-Bord ta' l-Appell ikkunsidra, fil-punt 12 tad-deċiżjoni kkontestata, li din il-kelma tindika l-kwalità u l-oriġini ġeografika tagħhom.

32     Għaldaqstant għandu jiġi eżaminat jekk is-sinjal EUROPREMIUM, mifhum bħala riferiment għal prodotti u servizzi ta' oriġini Ewropea u ta' kwalità għolja, jippreżenta, mill-perspettiva tal-pubbliku Anglofonu, rabta diretta u konkreta mal-prodotti u servizzi kkonċernati b'tali mod li jaqa' taħt il-projbizzjoni prevista fl-Artikolu 7(1)(ċ) tar-Regolament Nru 40/94.

33     Waqt is-seduta, l-UASI sostna li l-Qorti tal-Ġustizzja kienet iddeċidiet, fir-rigward ta' l-interpretazzjoni tad-Direttiva 89/104, li trade mark magħmula minn kelma jew neoloġiżmu komposta minn elementi li kull wieħed minnhom huwa deskrittiv ta' karatteristiċi tal-prodotti jew servizzi li għalihom saret applikazzjoni għal reġistrazzjoni hija fiha nnifisha deskrittiva, ħlief jekk teżisti differenza perċettibbli bejn il-kelma jew in-neoloġiżmu u s-sempliċi somma tal-partijiet ta' l-elementi li jiffurmawha (sentenzi Campina Melkunie, punt 20 iktar 'il fuq, punt 43 u Koninklijke KPN Nederland, punt 20 iktar 'il fuq, punt 104).

34     F'dan ir-rigward, għandu jiġi osservat li, f'dawn il-kawżi, in-natura deskrittiva ta' l-elementi li jiffurmaw it-trade mark li għaliha kienet saret applikazzjoni għal reġistrazzjoni ma kinitx f'dubju. Madankollu, bil-kontra ta' dak li jallega l-UASI, is-sinjal verbali in kwistjoni f'din il-kawża mhuwiex magħmul minn elementi deskrittivi tal-prodotti u servizzi mitluba mir-rikorrenti.

35     Rigward, l-ewwel nett, il-prefiss "euro", huwa importanti li jiġi mfakkar li huma biss is-sinjali deskrittivi tal-karatteristiċi essenzjali tal-prodotti jew servizzi in kwistjoni, li jistgħu, bħala tali, iservu sabiex jindikaw dawn ta' l-aħħar fil-lingwaġġ komuni, jaqgħu taħt il-projbizzjoni ta' l-Artikolu 7(1)(ċ) tar-Regolament Nru 40/94 (is-sentenza Procter & Gamble v UASI, punt 24 iktar 'il fuq, punt 39). Issa, il-Bord ta' l-Appell, wara li ddikjara fid-deċiżjoni kkontestata li l-prefiss "euro" kellu jiġi mifhum bħala riferiment għall-oriġini tal-prodotti u servizzi kkonċernati, ma ta, fl-imsemmija deċiżjoni, l-ebda motivazzjoni sabiex juri li l-oriġini hija karatteristika essenzjali tal-prodotti u servizzi koperti mill-applikazzjoni għal trade mark ikkunsidrata fl-għażla magħmula mill-pubbliku mmirat [ara, f'dan is-sens, sentenza ELLOS, punt 28 iktar 'il fuq, punt 42, u sentenza tal-Qorti tal-Prim'Istanza tas-26 ta' Novembru 2003, HERON Robotunits vs UASI (ROBOTUNITS), T-222/02, li għadha ma ġietx ippubblikata fil-Ġabra, punt 44] u li tippermetti lil dan il-pubbliku jistabbilixxi immedjatament u mingħajr ħsieb ieħor rabta konkreta u diretta ma' dawn il-prodotti u servizzi. Għaldaqstant, il-Bord ta' l-Appell ma ppruvax, fid-deċiżjoni kkontestata, li l-prefiss "euro" huwa deskrittiv tal-prodotti u servizzi in kwistjoni.

36     F'kull każ, il-Qorti tal-Prim'Istanza tosserva li l-oriġini mhijiex karatteristika essenzjali tal-prodotti u servizzi relatati mat-trasport bil-posta. Fil-fatt, l-oriġini ġeografika tal-prodotti li jaqgħu taħt il-klassijiet 16 u 20, li huma, essenzjalment, prodotti intiżi għall-ippakkjar ta' oġġetti ta' kull tip, mhijiex manifestament karatteristika deċiżiva ta' l-għażla tal-konsumatur, li ssir fuq il-bażi ta' fatturi bħad-dimensjonijiet ta' l-ippakkjar jew ir-reżistenza tiegħu. Fir-rigward tas-servizzi li jaqgħu taħt il-klassijiet 35 u 39, lanqas ma hemm raġuni sabiex jiġi kkunsidrat li l-oriġini hija karatteristika kkunsidrata mill-konsumatur medju fl-għażla tiegħu. Minn dan jirriżulta li l-prefiss "euro" ma jindikax il-prodotti u servizzi kkonċernati la direttament u lanqas permezz tar-riferiment għal waħda mill-karatteristiċi essenzjali tagħhom u għaldaqstant mhuwiex deskrittiv fir-rigward tagħhom.

37     Fir-rigward, imbagħad, tal-kelma "premium", huwa importanti li jiġi mfakkar li l-fatt li impriża tiftaħar, indirettament u b'mod astratt, l-eċċellenza tal-prodotti tagħha mingħajr madankollu ma tinforma direttament u immedjatament lill-konsumatur b'waħda mill-kwalitajiet jew karatteristiċi speċifiċi tal-prodotti u servizzi kkonċernati jaqa' taħt l-evokazzjoni u mhux id-deskrizzjoni fis-sens ta' l-Artikolu 7(1)(ċ) tar-Regolament Nru 40/94 (sentenza UltraPlus, punt 15 iktar 'il fuq, punt 27, u, f'dan is-sens, is-sentenza tal-Qorti tal-Prim'Istanza tal-31 ta' Jannar 2001, Sunrider vs L-UASI (VITALITE), T-24/00, Ġabra p. II-449, punti 22 sa 24].

38     B'hekk, il-Qorti tal-Prim'Istanza ddeċidiet li r-reġistrazzjoni ta' trade mark magħmula minn sinjali jew indikazzjonijiet li huma użati wkoll bħala slogans tar-reklamar, indikazzjonijiet ta' kwalità jew espressjonijiet sabiex iħajru x-xiri tal-prodotti u servizzi koperti b'din it-trade mark mhijiex eskluża, minħabba użu bħal dan, taħt il-kundizzjoni li t-trade mark in kwistjoni tista' tiġi pperċepita immedjatament bħala indikazzjoni ta' l-oriġini kummerċjali tal-prodotti jew servizzi kkonċernati, b'tali mod li, tippermetti lill-pubbliku rilevanti li jiddistingwi bla konfużjoni possibbli l-prodotti jew servizzi tal-proprjetarju tat-trade mark minn dawk li huma ta' oriġini kummerċjali oħra [is-sentenza tal-Qorti tal-Prim'Istanza tat-3 ta' Lulju 2003, Best Buy Concepts vs L-UASI (BEST BUY), T-122/01, Ġabra p. II-2235, punt 21].

39     Madankollu, din il-kapaċità ta' sinjal li jiġi pperċepit bħala indikazzjoni ta' l-oriġini kummerċjali tal-prodotti u servizzi għandha tiġi eżaminata fil-kuntest ta' l-Artikolu 7(1)(b) tar-Regolament Nru 40/94 [is-sentenza tal-Qorti tal-Ġustizzja tas-16 ta' Settembru 2004, SAT.1 SatellitenFernsehen vs L-UASI, C-329/02P, li għadha ma ġietx ippubblikata fil-Ġabra, punti 23 u 25; is-sentenzi tal-Qorti tal-Prim'Istanza tas-27 ta' Frar 2002, Rewe‑Zentral vs L-UASI (LITE), T-79/00, Ġabra p.II‑705, punt 26, u tat-30 ta' Ġunju 2004, Norma Lebensmittelfilialbetrieb vs L-UASI (Mehr Für Ihr Geld), T-281/02, li għadha ma ġietx ippubblikata fil-Ġabra, punt 24].

40     Minn dan jirriżulta li s-sinjali li għandhom natura ta' tifħir li jevokaw kwalitajiet astratti li impriża tfittex li tagħti lill-prodotti u lis-servizzi tagħha għall-finijiet ta' reklamar għandhom jiġu eżaminati fir-rigward ta' l-Artikolu 7(1)(b) tar-Regolament Nru 40/94.

41     Min-naħa l-oħra, sabiex jaqa' taħt l-Artikolu 7(1)(ċ) tar-Regolament Nru 40/94, l-unika dispożizzjoni in kwistjoni f'din il-kawża, sinjal verbali għandu jservi sabiex jindika b'mod speċifiku, preċiż u oġġettiv il-karatteristiċi essenzjali tal-prodotti u servizzi in kwistjoni [ara, f'dan is-sens, is-sentenza VITALITE, punt 37 iktar 'il fuq, punt 23; is-sentenzi tal-Qorti tal-Prim'Istanza tal-5 ta' April 2001, Bank für Arbeit und Wirtschaft vs L-UASI (EASYBANK), T-87/00, Ġabra p. II‑1259, punti 29 u 31, u UltraPlus, punt 15 iktar 'il fuq, punt 28].

42     Barra minn hekk, kif tfakkar ġustament ir-rikorrenti, il-Qorti tal-Prim'Istanza diġà ddeċidiet li kelma b'natura ta' tifħir, bħal UltraPlus, ma kinitx madankollu deskrittiva tal-prodotti in kwistjoni, f'dak il-każ platti tal-plastik għall-forn, ladarba ma kinitx tippermetti lill-konsumatur li jistabbilixxi immedjatament u mingħajr ħsieb ieħor rabta konkreta u diretta mal-prodotti kkonċernati (sentenza UltraPlus, punt 15 iktar 'il fuq, punt 26, u, f'dan is-sens, is-sentenza VITALITE, punt 36 iktar 'il fuq, punti 22 sa 24).

43     Issa, il-kelma "premium", fit-tifsira adottata mill-Bord ta' l-Appell, hija biss kelma ta' tifħir intiża sabiex tevoka karatteristika li r-rikorrenti jipprova jattribwixxi lill-prodotti tiegħu stess, mingħajr madankollu ma jinforma lill-konsumaturi bil-karatteristiċi speċifiċi u oġġettivi tal-prodotti jew servizzi offruti. Din il-kelma ma tistax għaldaqstant isservi sabiex tindika t-tip ta' prodotti u servizzi kkonċernati, la direttament u lanqas b'riferiment għall-karatteristiċi essenzjali tagħhom.

44     Billi s-sinjal verbali EUROPREMIUM mhuwiex għaldaqstant magħmul minn elementi deskrittivi tal-prodotti u servizzi kkonċernati, is-sentenzi tal-Qorti tal-Ġustizzja Campina Melkunie, punt 20 iktar 'il fuq, u Koninklijke KPN Nederland, punt 20 iktar 'il fuq, invokati mill-UASI, mhumiex rilevanti f'dan il-każ. Jibqa' biss li jiġi eżaminat jekk, minkejja dan in-nuqqas ta' natura deskrittiva ta' l-elementi li jiffurmaw dan is-sinjal, is-sinjal verbali in kwistjoni, meħud fit-totalità tiegħu, jippermetti lill-pubbliku mmirat li jistabbilixxi rabta immedjata u konkreta mal-prodotti u servizzi li għalihom saret applikazzjoni għal reġistrazzjoni.

45     F'dan ir-rigward, għandu jiġi osservat li l-Bord ta' l-Appell ma stabbilixxiex, fid-deċiżjoni kkontestata, li t-terminu "EUROPREMIUM" meħud fit-totalità tiegħu, kien, jew jista' ikun, isem ġeneriku jew abitwali sabiex jidentifika jew jikkaratterizza l-prodotti intiżi għall-ippakkjar, għall-ippostjar jew għat-trasport, tas-servizzi ta' reklamar, ġestjoni jew assistenza kummerċjali jew servizzi tat-trasport u ħżin [ara f'dan is-sens, is-sentenza tal-Qorti tal-Prim'Istanza tas-27 ta' Frar 2002, Eurocool Logistik vs L-UASI (EUROCOOL), T-34/00, Ġabra p. II-683, punt 50]. Id-deċiżjoni kkontestata tindika biss li dan is-sinjal verbali jevoka f'moħħ il-konsumatur l-impressjoni ta' prodotti u servizzi Ewropej ta' kwalità għolja mingħajr ma turi li din il-karatteristika hija tali li tippermetti lill-konsumatur sabiex jistabbilixxi immedjatament, u mingħajr ebda ħsieb ieħor, rabta diretta u konkreta mal-prodotti u servizzi msemmija hawn fuq.

46     B'hekk, billi ma bbażax l-analiżi tiegħu fuq il-prodotti u servizzi kkonċernati u billi ma weriex li s-sinjal verbali EUROPREMIUM, mifhum bħala riferiment għal prodotti u servizzi ta' oriġini Ewropea u ta' kwalità għolja, seta' jservi sabiex jindikaw l-imsemmija prodotti u servizzi, il-Bord ta' l-Appell kiser l-Artikolu 7(1)(ċ) tar-Regolament Nru 40/94.

47     Għaldaqstant id-deċiżjoni kkontestata għandha tiġi annullata.

 Fuq l-ispejjeż

48     Skond l-Artikolu 87(2) tar-Regoli tal-Proċedura tal-Qorti tal-Prim'Istanza, il-parti li titlef il-kawża għandha tbati l-ispejjeż, jekk dawn ikunu ġew mitluba. Peress illi l-UASI tilef, hemm lok li jiġi kkundannat ibati l-ispejjeż tar-rikorrenti, skond it-talbiet ta' din ta' l-aħħar.

Għal dawn ir-raġunijiet,

IL-QORTI TAL-PRIM’ISTANZA (It-Tielet Awla)

taqta' u tiddeċiedi:

1)      Id-deċiżjoni tar-Raba' Bord ta' l-Appell ta' l-Uffiċċju għall-Armonizzazzjoni fis-Suq Intern (Trade marks u Disinji) ta' l-20 ta' Ġunju 2003 (kawża R 348/2002-4) hija annullata.

2)      Il-konvenut huwa kkundannat ibati l-ispejjeż.

Azizi

Jaeger

Czúcz

Mogħtija f'Qorti bil-miftuħ fil-Lussemburgu, fit-12 ta' Jannar 2005

H. Jung

 

       M. Jaeger

Reġistratur

 

       President

* Lingwa tal-kawża: il-Ġermaniż.

Top

Full & Egal Universal Law Academy